"Zingatieni weledi katika kufanya kazi"- Mhe. Ndejembi

Tarehe iliyowekwa: June 10th, 2021

Leah Joseph 

Naibu Waziri Ofisi ya Rais Utumishi na Utawala bora Mh.  Deo Ndejembi amewataka watumishi wa Umma kufanya kazi kwa weledi huku wakifuata sheria na kanuni za utumishi wa umma.  

Hayo ameyasema wakati wa kikao na watumishi wa Wilaya ya Kondoa wakati akiongea  kilichofanyika katika ukumbi wa Kondoa Irangi hivi karibuni

"Utumishi wa umma ni kioo cha jamii hivyo watumishi wote mnatakiwa kufanya kazi kwa kufuata sheria,  kanuni na miongozo mbalimbali na ifike mahali watumishi muache kufanya kazi kwa mazoea na kusahau wajibu wenu, "amesema Mhe. Ndejembi

Hali kadhalika ameendelea kwa kuwataka watumishi wote kuondoa tofauti zao na migogoro mahala pa kazi badala yake wafanye kazi kwa bidii na ufanisi katika kuwatumikia wananchi .

"Nitoe rai kwa Maafisa Utumishi nchi nzima kurudi nyuma na kujitafakari waache kujifanya miungu watu badala yake wawatumikie watumishi kwa busara na wahakikishe kuwa kila mtumishi anayestahili kupanda daraja anapanda na atakayefanya kinyume atawajibishwa, "amesisitiza Mhe. Ndejembi

Hata hivyo ameongeza kuwa Serikali inatambua changamoto ya upungufu wa watumishi na kwamba wanajitahidi kuongeza ajira katika kada mbalimbali na kwamba Wilaya ya Kondoa haitasahaulika pindi serikali itapoajili watumishi.

Kwa upande wake Mkuu wa Wilaya ya Kondoa Mhe. Sezaria Makota  amewataka watumishi wote kuwajibika na kuweka mipango kazi na kuitekeleza kwa wakati uliopangwa na si vinginevyo.

Naye Mkurugenzi Halmashauri ya Mji Kondoa Msoleni Dakawa  amempongeza Mhe. Ndejembi kwa kuona umuhimu wa kuja Kondoa na kumuelezea changamoto zinazoikumba Halmashauri ya Mji ikiwemo ya upungufu wa watumishi katika sekta ya afya na elimu pamoja na kuchelewa kwa malimbikizo ya mishahara kwa watumishi.

Ziara ya Mhe. Naibu Waziri Ofisi ya Rais Utumishi na Utawala bora imefanyika kwa kukaa kikao cha pamoja na  watumishi na kilihudhuliwa na Mkuu wa Wilaya Kondoa,Katibu Tawala, Kamati ya Ulinzi na Usalama, Maafisa Tarafa Wakuu wa Idara na Vitengo,Watumishi wa Halmashauri ya Mji Kondoa na Wilaya.