“Zoezi la Anwani za makazi liende sambamba na upimaji wa viwanja”- RC Mtaka

Tarehe iliyowekwa: February 23rd, 2022

" Anuani za Makazi ziende sambamba na Upimaji wa Viwanja" RC Mtaka.

Mkuu wa Mkoa wa Dodoma Mhe Anthony Mtaka amewashauri wananchi wa Kondoa Mji kuwa zoezi la anuani za makazi liende sambamba na upimaji wa viwanja ili kuweza kuleta matokeo chanya.

Ushauri huo ameutoa wakati wa kikao cha uzinduzi wa anuani za makazi pamoja na postikodi kilichofanyika katika ukumbi wa Kondoa Irangi hivi karibuni.

"Leo tunazindua anuani za makazi tujitahidi kumaliza zoezi hili kwa wakati ili ifikapo tarehe 19 Machi Rais wetu anamaliza mwaka mmoja wa uongozi hivyo basi ni lazima  tumpe zawadi kwa kumwambia Kondoa Mji tumemaliza zoezi hilo kikamilifu", amesema RC Mtaka.

Ameendelea kwa kusema kuwa anatamani Kondoa Mji ibuni vyanzo vipya vya mapato ambavyo vitaisaidia Halmashauri kujiendesha yenyewe lakini pia amesema kuwa ili hayo yawezekane wanatakiwa kuhakikisha kuwa ardhi imepimwa tayari kwa matumizi mbalimbali.

"Ni vyema kuwa wabunifu kwa kuwa na vyanzo vingi vya mapato badala ya kutegemea vilevile ambayo haviwapeleki popote ifike mahali tufanye mageuzi kwenye Kata nane zenye mitaa 36 kwani uwezo mnao hamuendi kuroga mnafanya vizuri zaidi hivyo hakikisheni rasilimali yenu ardhi imepimwa na hakuna mtu anafanya shughuli za maendeleo kwenye ardhi ambayo haijapimwa", amesisitiza RC Mtaka.

Kwa upande wake Meneja wa Posta Mkoa wa Dodoma ndg Ferdinand Kabenela amesema kwamba nia ya Serikali ni kumsogeza mwananchi karibu na huduma za jamii na kumuwezesha kupata huduma anazostahili kwa uhakika.

"Anuani za makazi zipo katika ilani ya CCM lengo ni kuhakikisha kuwa watu wake wanapatikana wapi na wanaishi wapi hivyo tunapaswa kutambua makazi yako sawa upo Kondoa lakini unapatikana wapi", amesema Kabenela

Ameendelea kusema kuwa Postikodi ni mfumo maalum wa alama au tarakimu unaomtambulisha mtu anapoishi na kwamba anuani za makazi zina faida nyungi zikiwemo kuwezesha ununuzi wa bidhaa kwa njia ya mtandao, kuimarisha ulinzi na usalama pamoja na kurahisisha sensa za watu na makazi.

"Niwasihi wanakondoa mjitajidi kutoa majina ya mitaa yaliyorasimishwa ili kuondoa changamoto wakati wa kuingiza kwenye mfumo hivyo hizi taarifa zinatakiwa ziwe sahihi na ambazo hazibadiliki lakini pia sio tu kuweka miundombinu ya anuani hizi bali hata utunzaji wake hivyo wote tushiriki kikamilifu", amesisitiza Ndg. Kabenela.

Halikadhalika Mkuu wa Wilaya ya Kondoa Dkt. Khamisi Mkanachi amesema kuwa wamepokea vizuri zoezi hilo la anuani za makazi kilichobaki ni utekelezaji.

"Leo tunaenda kuzindua zoezi la anuani za makazi ambapo tuna kata nane na mitaa 36 na barabara 255 na mpaka sasa tumeweka vibao katika mitaa 76 nina imani kesho ya Kondoa itakuwa bora kuliko jana yake kuna siku Mkoa utajivunia Kondoa", amesema Dkt Mkanachi.

Hata hivyo akiongea awali Mkuu wa Wilaya ya Chemba Mhe. Simon Chacha amesema kuwa viongozi hawapaswi kuegemea upande wowote kwa kwa kufanya hivyo kunaleta matabaka na migogoro kazini badala yake wapaswa kufanya kazi kwa umoja na mshikamano kwa manufaa ya wananchi

"Ni lazima tuwape nafasi ya kuwasikiliza wale tunaowaongoza ili tujue wana mtazamo gani na maoni gani juu yetu kupitia wao tutaweza kujua nini kinahitajika kiwe ushauri wangu tuwe wamoja ili tuweze kusonga mbele", amesisitiza Dc Chacha.

Kikao cha uzinduzi wa anuani za makazi kwa Halmashauri ya Mji Kondoa kimefanyika ambapo mgeni alikuwa Mkuu wa Mkoa wa Dodoma Mhe. Anthony Mtaka  ambapo Kondoa Mji wameahidi kumaliza zoezi  hili kabla ya mwezi Machi ambapo kitaifa linatarajia kuhitimishwa ifikapo  Mei 30 mwaka huu.