Bilioni 3.7 za miradi ya maendeleo zapelekwa Kolo kwa miaka mitatu

Tarehe iliyowekwa: July 18th, 2024

Zaidi ya shilingi bilioni 3.7 za kutekeleza miradi ya maendeleo kuanzia mwaka 2021 hadi 2024 zimepelekwa katika kata ya Kolo Halmashauri ya Mji Kondoa zikiwa ni fedha kwa ajili ya ujenzi wa miundombinu ya maji, Elimu, afya na barabara.

Hayo yamesemwa na diwani wa kata ya Kolo Mhe. Iddi Ng’ungu mbele ya wajumbe wa kamati ya siasa mkoa, viongozi wa wilaya na wananchi wa mtaa wa Choka waliofika katika Zahanati ya Choka kujionea utekelezaji wa mradi huo hivi karibuni.

“Napenda kutoa shukrani zangu za dhati kwa Rais Dkt. Samia Suluhu Hassan kwa kututhamini sisi watu wa Choka na watu wa Kolo kwa kuwa ametuthamini na kusikiliza kilio chetu na kutuletea miradi ya maendeleo yenye thamani ya shilingi bilioni 3.7 na kwasasa kata nzima nimebakiza mtaa mmoja ambao hauna zahanati ila tumeanza kuchangishana nguvu kazi za wananchi ili kujenga zahanati hiyo,”amesema Mhe. Ng’ungu

Aidha ameishukuru serikali kwa kuwajengea Zahanati ya Choka ambayo imegharimu kiasi cha shilingi milioni 87 ikiwa shilingi milioni 75 ni fedha kutoka Serikali Kuu, shilingi milioni 9 fedha kutoka mapato ya ndani ya Halmashauri shilingi milioni 3 nuvu za wananchi na ipo katika hatua za mwisho za ukamilishaji

Akiongea katika kikao hicho Mkurugenzi wa Halmashauri ya Mji Kondoa Ndg. Saidi Majaliwa amesema kuwa Halmashauri inatambua mchango wa wananchi na itaendelea kuwaunga mkono wajumbe wa kamati ya zahanati kutokana na kufanya kazi kwa kujitolewa na kuhakikisha zahanati hiyo inakamilika na kuanza kufanya kazi mapema mwezi Agosti, 2024.

Kwa upande wake Mwenyekiti wa Halmashauri ya Mji Kondoa Mhe. Mohamed Kiberenge amewaomba wananchi wa Mtaa wa Choka na kata ya Kolo kuwa na imani na diwani wa kata hiyo kwa kuwa ndiye anayewapambania kuhakikisha miradi ya miradi inaletwa katika kata yao.

“Mheshimwa Mwenyekiti kata hii ndio ambayo imepiga hatua sana kimaendeleo ni kata ambayo huduma zote muhimu zimefika zahanati zimejengwa mitaa yote bado mmoja, kituo cha afya, barabara zimefunguliwa, maji yameletwa na madarasa yamejengwa na huo mtaa mmoja tunaangalia kama Halmashauri katika bajeti namna gani tutawaunga mkono”amesema Mhe. Kiberenge

Akiongea awali Katibu wa CCM mkoa wa Dodoma Ndg. Pili Agustino amesema anamshukuru Mheshimiwa Rais kwa kuwasaidia wananchi wa Choka kwa kuwasogezea huduma ya zahanati kwa kuwa walikuwa na changamoto ya huduma hiyo.

“Hata hivyo pia nawapongeza wote akiwemo mbunge, diwani, Mwenyekiti wa Halmashauri kwa kusimamia miradi ya maendeleo na nimeongea na Mkurugenzi amesema atahakikisha huduma inaanza tarehe 1, Agosti 2024 na yote hiyo sababu wanawajali wananchi,”amesisitiza Katibu Pili.

Kwa upande wake mmoja wa wananchi wa Mtaa wa Kolo Ndg. Mary Mbaga amemshukuru Rais kwa kuwajengea zahanati katika mtaa wao kwani walikuwa wanapata adha kusafiri umbali mrefu kufuata huduma ya afya na walitumia gharama kubwa kusafiri ambapo kwasasa wanaamini wataipata hapohapo mtaani.

Kata ya Kolo ina mitaa 5 ambapo serikali imejenga zahanati katika mitaa 4 na kituo cha afya kimoja na hadi sasa wananchiwa mtaa mmoja wa Gubali uliosalia wameshaanza kutoa nguvu kazi za kujenga zahanati katika mtaa wao na wamechangia shilingi milioni tatu na michango inaendelea.