Mkurugenzi Majaliwa awataka Watendaji wa Kata na Mitaa kuwajibika

Tarehe iliyowekwa: February 19th, 2025

Mkurugenzi wa Halmashauri ya Mji Kondoa Ndg. Said Majaliwa amewataka Watendaji wa Kata na Mitaa wasio wajibika katika maeneo yao kuwajibika na kufanya kazi kwa kushirikiana ili kuisaidia Halmashauri kufikia malengo.

Ameyasema hayo wakati wa kikao kazi na Watendaji hao kilichofanyika katika ukumbi wa mikutano wa Halmashauri ya Mji Kondo ana kuhudhuriwa na Watendaji wa kata zote 8 na Mitaa 36 hivi karibuni.

“Leo nimewaita ili tukumbushane baadhi ya vitu naona kama hatufanyi vizuri ikiwemo katika ukusanyaji wa mapato ikiwa nilipofika tu niliwaita nikawaambia kila mtu awe na rejesta ya wafanyabiashara katika eneo lake na kuangalia tarehe ya kulipia leseni lakini hamjafanya hivyo ikianza kuchukua hatua tusilaumiane”amesema Mkurugenzi Majaliwa

Aidha amewataka kuacha tabia ya kukaa na wanafunzi wa vitendo ofisini mwao badala yake wawafundishe kazi mbalimbali katika mitaa yao ikiwemo ukusanyaji wa mapato ili walete tija na kuwapongeza Watendaji wanaowafundisha kazi wanafunzi hao.

Ameendelea kuwataka Watendaji hao kutotoka vituoni bila ruhusa itakayopitishwa na Mkuu wa Idara ya Utawala na Usimamizi wa Rasilimali watu kwa upande wa Watendaji wa Mita na ruhusa itakayopitishwa na Mkurugenzi kwa Watendaji wa Kata kwani kutokuwepo kituoni kwa siku 5 mfululizo kunaweza kusababisha kufukuzwa kazi.

Ameongeza kwa kuwataka kusimamia miradi inayoendelea na kupelekewa fedha za mapato ya ndani na Serikali Kuu katika maeneo yao ikiwa ni pamoja na kujua kila kitu kinachoendelea katika miradi hiyo na kumweleza changamoto zinazojitokeza mapema ili zitatuliwe kwa wakati na kuwa na uwelewa wa pamoja.

“Nitaanza kutoa tuzo za kila mwezi kuanzia mwezi Februari kwa Mtendaji atakayefanya vizuri ambapo itafanyika tathmini kwa kutumia vigezo vya usimamizi wa miradi, usimamizi wa usafi na ukusanyaji wa mapato hii ikawe motisha kwetu katika kufanya kazi kwa bidi”amesisitiza Mkurugenzi Majaliwa.