Walemavu kunufaika na mikopo ya asilimia 10 Kondoa Mji

Tarehe iliyowekwa: October 1st, 2024

Katika juhudi za kupunguza umasikini na kuinua kipato cha wananchi hususani watu wenye ulemavu Halmashauri ya Mji Kondoa imetoa semina maalumu kwa watu hao kuhusu vigezo na namna ya ukopaji wa mikopo ya asilimia 10 inayotolewa na Halmashauri mikopo ambayo ilisitishwa mwezi Aprili 2023.

Mkuu wa Divisheni ya Maendeleo ya jamii Halmashauri ya Kondoa Mji Ndg. Irene Mosha ameeleza kuwa sababu  iliyosababisha mikopo ya asilimia 10 kusimama kwa muda ilikuwa ni kufanya maboresho ya kanuni za utoaji mikopo ili mikopo inayotolewa iwe na tija.

"Maboesho yamefanyika katika umri ambapo kwa sasa  kijana kuanzia miaka 18-45 atapata mkopo wakati hapo awali umri wa kijana ulikuwa ni kuanzia miaka 18 hadi 35 hivyo marekebisho hayo yameongeza wigo kwa vijana wengi kupata mikopo hiyo.

Bi Irene ameeleza kuwa  kigezo cha mtu kupata mkopo huo ni kuwa na namba ya NIDA kwani uwepo wa namba hiyo utarahisha upatikanaji wa taarifa muhimu za mkopaji katika mfumo.

Ameendelea kueleza kuwa ili kuongeza ufanisi zaidi wa mikopo Idara ya Maendeleo ya Jamii utafanya ukaguzi wa andiko la biashara husika, soko pamoja na kuangalia uhalisia wa biashara kabla ya kutoa mikopo kwa wakopaji kwani hii itasaidia kupunguza hasara kwa wanufaika wa mikopo hiyo.

Bi Irene amesisitiza wakopaji wote wa mikopo ya asilimia 10 kuhakikisha wanarejesha pindi muda unapofika ili kuweza kutoa nafasi ya watu wengine kukopa.

Mkurugenzi wa Halmashauri ya Kondoa Mji Ndugu Said Majaliwa ameiambia Idara ya Maendeleo ya jamii kuharakisha utoaji wa mikopo hiyo kwa wanufaika kwa kuwa fedha zilitengwa kwaajiri yao hivyo hakuna haja ya zoezi hilo kuchelewa.

Mikopo ya asilimia 10 hutolewa Kila mwaka kwa watu wenye ulemavu, vijana pamoja na wanawake ili kuwasaidia kujiinua kiuchumi.