DC Nyangasa atatua kero za wananchi kata ya Serya

Tarehe iliyowekwa: August 15th, 2025

Mkuu wa Wilaya ya Kondoa Mhe.Fatma Nyangasa amekutana na wananchi wa Kata ya Serya na kutatua kero mbalimbali mara baada ya kumaliza ziara yake ya kutembelea miradi  iliyopo katika Kata hiyo.

Wananchi wa Kata ya Serya wameeleza kero zao ikiwemo changamoto ya daraja katika mto Bubu, ukosefu wa umeme katika kituo cha afya Serya, ukosefu wa eneo la malisho ya mifugo pamoja na changamoto ya maji.

Nyangasa amewashukuru wananchi wa Serya kwa kuwasilisha Kero zao na kuahidi kuzifanyia kazi ikiwemo kuwasilisha na kufanya ufuatiliaji kwa mamlaka husika.

"Ndugu zangu nimeyasikia yote, suala la Mtoto Bubu nimeshaliwasilisha kwa mamlaka husika TANROAD ambao ndio wanahusika na madaraja na ninaendelea kulifuatilia" Nyangasa

Kuhusu suala la mipaka pamoja na changamoto ya Wanyamapori kuvamia maeneo ya wananchi Mhe.Nyangasa ameeleza kuwa atakaa na wataalamu wa maeneo hayo Ili kuona namna bora ya kutatua changamoto hizo.

Kabla ya kuanza kutatua Kero za wananchi wa Serya Nyangasa ametembelea mradi wa ujenzi wa Zahanati ya Chandimo ambayo mpaka Sasa imekamilika kwa zaidi ya asilimia 90,  pamoja na mradi wa shule ya Msingi Hurumbi katika mtaa wa Chandimo.

Mkuu huyo wa Wilaya ameambatana na wataalamu mbalimbali pamoja na Mkurugenzi wa Halmashauri ya Mji Kondoa Ndg.Said Majaliwa pamoja na Katibu Tawala Wilaya ya Kondoa Mhe.Christina Kalekezi.

Nyangasa pia amewasihi wananchi kuhakikisha wanajitokeza kwa wingi kwenda kupiga kura itakapofika oktoba 29 mwaka huu Ili waweze kuwachagua viongozi wao akiwemo Rais, Mbunge pamoja na Diwani.