"Fanyeni kazi kwa umoja na mshikamano kwa manufaa ya wananchi" - Mwenyekiti Kiberenge

Tarehe iliyowekwa: September 30th, 2021

Na. Leah  Joseph

Mwenyekiti wa Halmashauri ya Mji Kondoa Mhe. Mohamed Kiberenge amewaasa watumishi pamoja na viongozi ndani ya Halmashauri ya Mji Kondoa kuendelea kudumisha umoja na mshikamano katika kutekeleza shughuli za Serikali za kuleta maendeleo kwa wananchi.

Kauli hiyo ameitoa wakati wa kikao cha baraza maalum la kupitisha hesabu za mwisho za Halmashauri kwa mwaka wa fedha 2020/2021 kilichofanyika katika ukumbi wa mikutano wa Halmashauri ya Mji Kondoa hivi karibuni.

"Sitaki kusikia kuna mgawanyiko wa makundi ndani ya Halmashauri ninayoiongoza ninachotaka ni kuona tunadumisha amani na mshikamano na tunafanya kazi kwa pamoja kwa sababu sisi ni wamoja na Kondoa ni ya kwetu sote" , amesema Mhe. Kiberenge.

Mhe. Kiberenge ameendelea kwa kusema kuwa ni wajibu wa kila mtu kwa nafasi yake kufanya kazi kwa bidii ili kuwaletea wananchi maendeleo na katika kufanikisha hilo ni vema kila mtu awe na hofu na utu ndani yake na kuachana na malumbano badala yake mwenye changamoto  ajibiwe kwa hoja na sio vijembe.

Halikadhalika Katibu Tawala Wilaya ya Kondoa Andrea Ng'wani amewaomba washiriki wa baraza hilo kuendelea kuunga mkono juhudi za Rais wetu Mhe. Samia Suluhu Hassan kwa kujitokeza kupata chanjo ya UVIKO 19 ambayo inatolewa bure bila malipo katika vituo vyote vya afya.

"Nitoe rai kwa watu wote  kuendelea kuwa mabalozi wa kuhamasisha wananchi kupata chanjo ya UVIKO 19 kwani ugonjwa huu  bado upo na unaua lakini pia ninaimani kuwa watanzania ni waelewa tuendelee kuwaelimisha hatimaye wote watachanja "amesisitiza Katibu Tawala.

Hata hivyo Katibu Tawala Msaidizi Serikali za Mitaa Mkoa wa Dodoma Nathalis Linuma amewapongeza viongozi wa Halmashauri ya Mji Kondoa kwa jinsi walivyokuwa wanajibu hoja zilizokuwa zinawasilishwa na Waheshimiwa Madiwani ambapo amewashauri kuzifanyia kazi hoja ambazo hazijakaa sawa ili kuepuka kupata hati chafu.

"Mnaonekana mlivyo makini sana kwani nimeona jinsi mlivyokuwa mnaweka vitu sawa kwa hilo hongereni sana ninaimani kupitia Mkurugenzi wenu mtakaa na mtajadili hoja zenu vizuri na kuziweka sawa mapema ili baadae ziweze kule matokeo mazuri na hatimaye Kondoa ipate hati safi kama ilivyokuwa mwanzo" ,amesisitiza Linuma

Kwa upande wake Mwenyekiti wa Chama Cha Mapinduzi Wilaya ya Kondoa Mohamed Kova amesema kuwa ni lazima kila mtu kwa ujuzi wake alionao afanye kazi kwa bidii bila kuona haya wala kuogopa vitisho kwa ili kuhakikisha Halmashauri inasonga mbele.

"Nilazima Viongozi, Wataalamu na wananchi tuwe kitu kimoja kwa kufanya hivyo mafanikio yatapatikana hivyo  basi zingatieni ufanisi ili kuzitendea haki taaluma zenu mlizosomea na mtu akifanya vizuri asijisifie bali angoje asifiwe ili apate moyo wa kuendelea kufanya vizuri zaidi" , amesisitiza Mwenyekiti Kova.

Kikao cha baraza maalum la kupitisha hesabu za mwisho za Halmashauri kwa mwaka wa fedha 2020/2021 kimefanyika kikiwa na lengo la kuwasilisha na kujadili taarifa hiyo ambapo kilihudhuliwa na Waheshimiwa Madiwani, Kamati ya Ulinzi na Usalama, Menejimenti pamoja na Wananchi.