Kondoa Mji wafungua juma la Elimu ya Watu Wazima

Tarehe iliyowekwa: August 13th, 2025

Halmashauri ya Mji Kondoa  wamefungua juma la elimu kwaajili ya kuonesha shughuli mbalimbali zinazofanywa na vikundi mbalimbali kupitia kitengo Cha elimu ya watu wazima na Elimu nje ya mfumo rasmi.

Lengo la maadhimisho hayo ni kujenga uelewa wa dhana ya Elimu ya watu wazima na Elimu nje ya mfumo rasmi kwa kupima na kutafakari mafanikio na changamoto zilizopo katika utoaji wa elimu ya watu wazima yenye azma ya kufuta ujinga, umasikini pamoja na maradhi.

Kwa mwaka 2024/2025 Halmashauri ya Mji Kondoa imeandikisha Wanafunzi 105 wa MEMKWA katika vituo 11 huku kati Yao wavulana ni 49 na wasichana ni 56. Moja wapo ya Vituo vilivyoandikisha wanafunzi hao ni Chandimo, Mongoroma, Munguri, Tungufu, Bolisa pamoja na Kingale.

Katika kuhakikisha vijana wanajifunza fani mbalimbali za ufundi Halmashauri ya Mji Kondoa imeendelea kudahili Wanafunzi wa masomo ya muda mfupi na muda  mrefu katika Chuo Cha Maendeleo ya Jamii Munguri FDC ambapo mpaka Sasa Kuna jumla ya wanafunzi 203 wanaoendelea kupata mafunzo ya ufundi stadi.

Hata hivyo kupitia Programu ya IPOSA inayotekelezwa na Halmashauri ya Mji Kondoa Vijana wameweza kujifunza fani mbalimbali ikiwemo Uashi, Ufundi Chuma, Umeme, Upishi, Ushonaji, Useremala pamoja na Ujasiriamali. Katika Programu ya IPOSA jumla ya Vijana 237 wamejiandikisha maeneo mbalimbali huku wanaume wakiwa 88 na wanawake wakiwa ni  149 wakitokea maeneo mbalimbali ikiwemo Chandimo, Kolowasi pamoja na Maji ya Shamba.

Halmashauri ya Mji Kondoa inawasihi wananchi mbalimbali kujitokeza kwa wingi Ili waweze kujiunga na kujiendeleza kupitia program mbalimbali zinazotolewa kupitia elimu ya watu wazima Ili kuondokana na ujinga, umasikini pamoja na maradhi kwa kusoma fani za ufundi, afya, kilimo pamoja na Ufugaji.

Kilele cha maadhimisho hayo ni tarehe 18.08.2025 katika Iwanja wa Puma uliopo ndani ya  Halmashauri ya Mji Kondoa huku mkuu wa Mkoa wa Dodoma Mhe.Rosemary Senyamule ndiye atakuwa Mgeni rasmi katika Kilele hicho.