Kondoa Mji wapongezwa kutoa mikopo ya asilimia 10 awamu ya pili

Tarehe iliyowekwa: February 19th, 2025

Uongozi wa Halmashauri ya Mji Kondoa umepongezwa kwa kuhakikisha adhma ya serikali ya kuwezesha wananchi kiuchumi inafanikiwa baada ya kutoa mikopo itokanayo na asilimia 10 ya mapato yenye thamani ya shilingi milioni 168.9 kwa awamu ya pili.

Pongezi hizo zimetolewa na Mkuu wa Wilaya ya Kondoa Mhe. Fatma Nyangasa wakati wa hafla ya kukabidhi hundi zenye thamani ya shilingi milioni 168.9 na pikipiki 20 kwa vikundi 19 vilivyopata mkopo iliyofanyika katika viwanja vya Stendi ya Zamani.

“Niwapongeze Mwenyekiti na Mkurugenzi wa Halmashauri ya Mji Kondoa kwa kutoa leo milioni 168 ndani ya miezi mitatu baada ya ile mikopo ya awali na kufanya jumla ya zaidi ya shilingi milioni 360 kutolewa kwa vikundi 36 hizi ni fedha nyingi kwa halmashauri inayokuwa kama Kondoa Mji hongereni sana,”amesema Mhe. Nyangasa

Aidha amewaasa wanufaika wa mikopo hiyo kuhakikisha kuwa inakwenda kutekeleza lengo kusudiwa na si vinginevyo ikiwa ni pamoja na kufanya marejesho kwa wakati ili kukuza mfuko wa mikopo na kuwanufaisha waombaji wengine ili nao wainuke kiuchumi na kujitengemea.

“Lakini katika harakati za kutafuta maisha kuna mengi nawaomba mkajiepushe kuchukua mikopo katika taasisi zinazoibuka ambazo zinatoa mikopo inayowaumiza wananchi na serikali kuliona hili ikatoa mikopo hii hivyo tuitumie vizuri fursa hii ya mikopo inayotolewa na kutumia taasisi rasmi kukopa fedha ili kuepuka usumbufu hapo baadae”amesisitiza Mhe. Fatma

Ameongeza kwa kuzishauri taasisi za fedha kuanza kuibua mikopo yenye masharti nafuu ambayo wananchi wanaweza kunufaika ili miaka mitano ijayo mabadiliko yaonekane na kusema kuwa hana mashaka na vikundi vilivyokopeshwa kwa kuwa vimepitia michakato yote muhimu kabla ya kupewa mkopo.

Akitoa taarifa awali Mkurugenzi wa Halmashauri ya Mji Kondoa Ndg. Said Majaliwa amesema Halmashauri awali wametoa shilingi milioni 197.7 kwa vikundi 17 na sasa imetoa shilingi milioni 168.9 kwa vikundi 19 ambapo jumla ya shilingi milioni 366 kwa awamu mbili.

“Mhe. Mkuu wa Wilaya leo tumetoa shilingi milioni 168.9 kwa vikundi 19 ambapo kati ya hivyo vikundi 9 ni wanawake, 7 vijana na 3 ni watu wenye ulemavu na wamepata fedha zao kupitia benki zetu za CRDB na NMB, lakini pia Halmashauri tumeendelea kutoa zabuni kwa vikundi tulivyoviwezesha ikiwemo kikundi cha Mwangaza”amesema Mkurugenzi Majaliwa

Ameendelea kueleza kuwa Halmashauri itaendelea kutenga fedha na kuvikopesha vikundi vyote vitakavyokidhi vigezo na kuendelea kuwapatia zabuni katika miradi inayoendelea ili kuhakikisha wanufaika wananufaika na kuukuza mji wa Kondoa.

Akiongea kwa niaba ya wanavikundi Ndg. Philipo Chonya amesema wanaishukuru Serikali inayoongozwa na Rais Dkt. Samia Suluhu Hassan kwa kuwaona vijana wa bodaboda na kuwapatia pikipiki kwa kuwa walikuwa wakipata shida katika pikipiki za mkataba walizokuwa wakifanya awali na kuahidi kurudisha mikopo kwa wakati.