Kondoa Mji washauriwa kutumia kanuni na Mbegu bora za alizeti

Tarehe iliyowekwa: January 26th, 2022

Na: Leah Joseph - Kondoa

Afisa Kilimo Mkoa waDodoma Bw.Benard Abraham amewashauri wakulima wa alizeti ndani ya Halmashauri ya Mji Kondoa kutumia mbegu bora za alizeti ili kupata mazao mengi yenye tija na yatakayowaletea faida kubwa.

Ushauri huo ameutoa wakati wa mafunzo ya kuinua kilimo cha alizeti na namna bora ya kupanda zao hilo yaliyofanyika katika viwanja vya shule ya Msingi Mpalangwi hivi karibuni.

“Kila zao ama mmea unaopandwa una nafasi yake inayotakiwa kupandwa na ndio maana leo hii tupo hapa kuwafundisha namna bora ya upandaji kwa kuzingatia aina bora ya mbegu lengo ni kupata mazao mengi yatakayotuletea faida”amesema Bwana Bernard.

Aidha ameendelea kwa kusema kuwa wakulima wanatakiwa kupanda kwa kuzingatia nafasi ambazo wameelekezwa na wataalam kwakuwa mavuno mengi yanategemena na wingi wa mimea hivyo wakulima waache kulima kwa mazoea na kulalamika kuwa soko ni baya badala yake waongeze juhudi na kulima kwa tija.

“Hii shughuli ya kilimo ambayo tunayoifanya inatughalimu pesa nyingi nguvu na muda wetu hivyo basi ni lazima tuifanye kwa usahihi na kwa wakati kwani tukienda kinyume na hapa inatupeleka kwenye umaskini na hasara kubwa”amesisitiza Bwana Bernard

Kwa upande wake Afisa Kilimo Halmashauri ya Mji Kondoa Hassan Kiseto amesema kuwa huu ni mpango wa kilimo cha alizeti kwa mikoa minne ya kipaumbele wenye lengo la kupunguza uhaba wa mafuta ya kula nchini ambapo Mkoa wa Dodoma ni mmojawapo na kwamba Waziri mwenye dhamana ameichagua Halmashauri ya Mji Kondoa Kata ya Suruke ambapo atakuja kuzindua mpango mkakati wa uzalishaji wa zao la alizeti.

“Katika Halmashauri ya Mji Kondoa Serikali imeona na sisi isituache bure hivyo basi imetuletea mbegu kwa bei ya ruzuku ambayo kila mwananchi anaweza kuimudu shilingi 3500 kwa kilo ambapo tulipokea tani 11 lakini mpaka sasa tumeuza tani 4 bado tani 9”ameongeza Hassan Kiseto.

Halikadhalika ameendelea kwa kusema kuwa itakuwa siyo vyema Wizara kutoa mbegu alafu zibaki hivyo ametoa wito kwa wakulima wote kuchangamkia fursa hii kununua mbegu zote na kuzingatia upandaji wa kisasa kwani mpaka sasa Serikali haina mpango wa kuagiza mafuta ya kula nje ya nchi lengo ni kuwainua wakulima wa ndani wa alizeti kuuza mafuta yao kwa bei nzuri ili wapate faida na kuondoa tatizo la uhaba wa mafuta ya kula nchini.

Hata hivyo Afisa Ugani Kata ya Suruke Bi.Hamida Ramadhan amewaambia wakulima wa alizeti namna bora ya upandaji wa zao la alizeti ikiwa ni pamoja na kufuata sm 30 shimo kwa shimo na sm 75 mstari kwa mstari hii ni kwa mbegu moja na sm 60 urefu na upana sm 75 kwa mbegu mbili na shimo linatakiwa kuchimbwa sm 7 na mbolea inayopendekezwa ni Yala otesha na Dapo.

“Wakati wa kupanda sio lazima utumie mbegu ya dukani unaweza kutumia samadi na ndio maana tunawashauri kuanza maandalizi ya mashamba mapema lengo ni kupata mazao mengi yenye faida”amesisitiza Bi. Hamida.

Mafunzo ya mpango wa kilimo cha alizeti yamefanyika ambapo yamehudhuriwa na wataalamu wa kilimo toka Wizara ya Kilimo,Maafisa Kilimo ngazi ya Mkoa na Halmashauri, Maafisa Ugani na wakulima.