Mkurugenzi aiongoza Menejimenti kusikiliza kero Kingale

Tarehe iliyowekwa: May 29th, 2024

Mkurugenzi wa Halmashauri ya Mji Kondoa Ndg. Said Majaliwa amewaongoza wajumbe wa Timu ya Menejimenti kusikiliza na kutatua kero za wananchi wa kata ya Kingale ikiwa ni sehemu ya utekelezaji wa kauli mbiu ya mkoa ya Kero yako,wajibu wangu.

Kazi hiyo imefanyika katika Ofisi ya kata ya Kingale ambapo pia ilihusisha wataalam wote wa kata ya Kingale ikiwa ni siku ya kwanza kati ya siku tatu za ziara ya kata kwa kata itakayofanywa na Mkurugenzi na Wakuu wa Idara.

Akiongea na wataalam wa kata ya Kingale wakati wa kuhitimisha zoezi hilo Mkurugenzi amewataka Maafisa Watendaji wa Kata kuiga mfano huo kwa kutenga angalau siku moja kwa wiki kufika katika mitaa yao na kusikiliza na kutatua kero za wananchi badala ya kukaa ofisini.

“Mtoke mkawasikilize wananchi kero iliyo nje ya uwezo wenu ileteni Halmashauri ili tuitatue tusiwaache wananchi wakakaa na changamoto zinazoweza kutatulika na usiende peke yako wabebe na wataalam wote waliopo ngazi ya kata mkawahudie wananchi,”amesema Mkurugenzi Majaliwa

Aidha ameahidi kuendelea kuwawezesha watendaji fedha kwa ajili ya uendeshaji wa ofisi za mitaa ili waweze kufanya kazi ya kuwahudumia kwa ufanisi zaidi wananchi na kuwataka watendaji wasiokaa katika maeneo yao kurudi katika maeneo yao.

“Kero zote tumezipatia majibu isipokuwa za TARURA na TANESCO tumezichukua na tutaziwasilisha kwa wahusika kwa ajili ya kupata ufumbuzi na majibu tutayarudisha kwenu mhakikishe wananchi wanapata mrejesho huo”amesisitiza Mkurugenzi Majaliwa

Ameendelea kuwataka Watendaji wa Kata na Mitaa kuhakikisha wanahamasisha kujitokeza kujiandikisha kwenye daftari la wapiga kura zoezi linalotarajia kuanza hivi karibuni ikiwa ni pamoja na kushiriki katika uchaguzi wa serikali za mitaa.

Awali wananchi wa kata ya Kingale wamewasilisha changamoto kubwa zinazowakabili katika kata yao kuwa ni pamoja na kukatika mara kwa mara kwa umeme, changamoto ya kukosekana kwa mawasiliano ya simu kwa baadhi ya maeneo na upatikanaji wa maji ya uhakika.

Mkurugenzi na Wakuu wa Idara wamepata fursa ya kusikiliza kero na kuzitatua zilizo chini ya Halmashauri na kuzichukua zingine kwa ajili ya kuziwasilisha katika ofisi husika kwa ajili ya kupata ufumbuzi ambapo wamefanikiwa kuwasikiliza wananchi wote 20 waliojitokeza na zoezi liaendelea kwa mwezi huu kwa kata ya Kondoa Mjini na Kilimani.