Timu ya Menejimenti yapatiwa mafunzo ya PPP kuongeza mapato

Tarehe iliyowekwa: February 17th, 2025

Timu ya Menejimenti ya Halmashauri ya Mji Kondoa imepata mafunzo kutoka kituo cha ubia baina ya sekta za Umma na sekta binafsi (PPP) ya namna ambavyo Serikali za Mitaa zinavyoweza kuibua miradi mbalimbali ya ubia kati ya sekta ya Umma na sekta binafsi.

Kupitia mfumo wa PPP miradi ya Umma hutekelezwa na sekta binafsi kwa niaba ya serikali hivyo endapo halmashauri itakuwa na miradi ya PPP itaweza kuongeza mapato zaidi kwani sekta binafsi hutekeleza miradi kwa ufanisi zaidi.

Akiongea na Timu ya Menejimenti ya Ndg. Dakawa Msoleni ambaye ni mratibu wa miradi ya PPP kutoka Wizara ya Fedha amesema kuwa endapo halmashauri zitakuwa na mapato ya kutosha zitapunguza utegemezi kutoka serikali kuu.

Msoleni amesema kuwa katika Halmashauri ya Mji Kondoa miradi ya ubia ambayo inaweza kuibuliwa ni pamoja na ujenzi wa hoteli za nyota 5 pamoja na ujenzi wa uwanja wa mpira kwani Tanzania itakuwa mwenyeji wa  mashindano ya AFCON 2027 hivyo ni vema kuandaa miundombinu muhimu mapema Ili halmashauri iweze kujiongezea mapato.

Kwa upande wake Mkurugenzi wa Halmashauri ya Mji Kondoa Ndg. Said Majaliwa amewashukuru viongozi walifika na kuwakaribisha Kondoa Mji na kuahidi kutoa ushirikiano wakati wowote watakaokuja.

Halmashauri ya Mji Kondoa imepitiwa na Barabara kuu ambayo inaunganisha Afrika ya Kusini na Cairo hivyo endapo hoteli kubwa zitajengwa zitaleta tija kwa halmashauri kwani licha ya uwepo wa barabara kuu ya Africa bado Halmashauri ya Mji Kondoa ipo karibu na vivutio mbalimbali vya watalii zikiwemo mbuga za wanyama pamoja na michoro ya Kondoa Irangi