"Wakandarasi wa Maji Bolisa na Mongoroma Zingatieni Muda"- Mhe. Mafita

Tarehe iliyowekwa: May 29th, 2019

Wakandarasi  waliosaini mikataba ya usambazaji wa miundombinu ya maji katika mitaa ya Bolisa na Mongoroma wametakiwa kutekeleza kazi walizopewa kwa ufanisi na kukamilisha kazi hizo kwa wakati.

Hayo yalisemwa na Mwenyekiti wa Halmashauri ya Mji Wa Kondoa Mhe. Hamza Mafita wakati wa kusaini mikataba ya usambazaji wa miundombinu ya maji katika mitaa ya Bolisa na Mongoroma zoezi lililofanyika katika Ofisi za Mwenyekiti huyo hivi karibuni.

“Mmepewa idhini ya kufanyakazi mkafanyekazi kweli wananchi wengi wana shida kubwa ya maji hivyo mnapoenda kuanza kazi mjue mna jukumu kubwa la kuhakikisha maji  yanawafikia wananchi kwa muda mliopewa.” Alisema Mhe. Hamza

Aidha  aliwataka wakandarasi hao kuwasilisha changamoto zote zinazowakabili mapema ili zifanyiwe kazi na viongozi ikiwa ni pamoja na kutoa taarifa ya changamoto hizo kwa wananchi ili kuepusha mkanganyiko wakati wa utekelezaji wa miradi hiyo.

“Kabla ya kuanza kazi mtatakiwa kwenda kujitambulisha kwa wananchi kwa kupitia mikutano ya hadhara ya  mitaa ili wananchi wawatambue na kuwapa ushirikiano kwani mabomba yanaweza kupita katika makazi yao na mashamba yao.” Alisisitiza Mhe. Hamza

Awali serikali ilitoa fedha kwa ajili ya usambazaji wa miundombinu ya maji katika visima vitano ambapo miradi hiyo imekamilika na kutoa huduma ya maji kwa wananchi na miradi hiyo ni katika mitaa ya Kwapakacha, Wisi kwa Ntisi, Kilimani, Tumbelo na Kichangani.

Miradi ya usambazaji wa miundombinu ya maji katika visima vya mtaa wa Bolisa utagharimu kiasi cha Tshs. 643,139,737.60 chini ya Kampuni ya Mponela Construction Ltd na  Mongoroma  utagharimu kiasi cha Tshs. 728,890,212.60 chini ya kampuni ya Kellogg Company Ltd miradi inayotarajiwa kuanza mapema mwezi Juni.