Walimu watakiwa kuunga mkono juhudi za Rais Samia

Tarehe iliyowekwa: August 1st, 2023

Walimu wa Shule za Msingi mkoa wa Dodoma wametakiwa kufanyakazi kwa bidii ili kuunga mkono juhudi za Mhe. Rais Dkt. Samia Suluhu Hassan alizofanya katika kuboresha sekta ya elimu.

Kauli hiyo imetolewa na Jane Amani Afisa Elimu Taaluma mkoa wa Dodoma wakati wa ufunguzi wa mafunzo ya siku nne kwa walimu zaidi ya 50 wa shule za msingi Dodoma kupitia program ya Shule Bora.

"Tumewaita hapa kwa lengo la kuboresha ufundishaji kwa kuwa mnashinda nao muda wote hivyo vitu vingi wanaiga kutoka kwenu ikiwemo elimu na kazi za mikono hivyo kama nyie hamtaweza naye hataweza,"amesema Afisa Elimu Taaluma

Ameongeza kuwa ulitolewa mtihani ambapo baadhi ya watoto walionekana kutofanya vizuri katika stadi za KK hivyo wamewakutanisha wote ili wabadilishane uzoefu na wote wafanye vizuri.

"Watoto wanashida mbalimbali tuone namna unavyomsaidia kutokana na ulemavu wake au mateso ya ndugu nyumbani sababu walimu raha yetu ni kuona matokeo mazuri yanatokea kwa wanafunzi uliyemfundisha hivyo mkitoka hapa mtusaidie kuwasaidia wanafunzi hao,"amesisitiza Afisa Elimu Taaluma

Aidha amewataka washiriki hao kuhakikisha kuwa wanakuwa mabalozi wazuri kwa wazazi ili wachangie chakula shuleni kwaajili ya wanafunzi sababu ni vigumu mwanafunzi kuelewa akiwa na njaa.

"Suala la usalama wa wanafunzi sisi ndio wa kuwasemea sababu wanafanyiwa matendo ya kikatili ikiwemo kulawitiwa na kubakwa hivyo nina imani mafunzo  haya yataenea Dodoma nzima na tukiamua kwenda kusema tutafanikiwa vizuri na kuwa chachu ya kuifanya taaluma iwe juu," amesema Afisa ElimuTaaluma