Watakiwa kujikinga na Corona Daftari la Kudumu la Wapiga

Tarehe iliyowekwa: April 30th, 2020

Maafisa wandikishaji na BVR Operators daftari la wapiga kura awamu ya pili Halmashauri ya Mji Kondoa wametakiwa kuchukua tahadhali ya kupata maambukizi ya Virusi vya Corona wakati wa zoezi la uandikishaji litakalofanyika kwa siku tatu katika halmashauri hiyo.

Hayo yamesemwa na Mkurugenzi wa Halmashauri ya Mji Kondoa wakati wa kufungua mafunzo kwa maafisa waandikishaji na BVR Operators yaliyofanyika katika ukumbi wa Chuo cha Uuguzi Kondoa Mjini.

“Najua mnaenda kukutana na idadi kubwa ya watu nawasihi sana mkachukue tahadhari zote muhimu kutokana na maelekezo yanayotolewa na wataalamu wa afya ikiwemo kunawa mikono mara kwa mara bila kuchoka, kuvaa barakoa muda wote pamoja na kutumia vitakasa mikono kila wanapomhudumia mwananchi,”alisema Mkurugenzi Dakawa.

Aidha aliongeza kwa kuwataka kusafisha vifaa vyao vya kufanyia kazi mara kwa mara na kuepuka kujishika au kushika simu mara kwa mara kwani kwa kufanya hivyo wanaweza kuhatarisha afya zao na kupata maambukizi ya virusi vya Corona jambo ambalo hawalitarajii kabisa.

Awali Mkurugenzi huyo ambaye pia ndiye Afisa Mwandikishaji jimbo la Kondoa Mjini aliwapongeza maafisa hao waliochaguliwa na kuwasihi kuwa makini katika kusikiliza mafunzo kwa umakini kwani kwa kufanya hivyo watafanya kazi kwa ufanisi mkubwa.

“Naamini mliopo humu awamu ya kwanza mlikuwepo na mlifanya kazi vizuri ndio maana mkachaguliwa tena hivyo mna uzoefu mkafanye kazi kwa kufuata kanuni, sheria na taratibu kwani kila kitu hapa kinafanyika kwa mujibu wa vitu hivyo tunawaamini,”alisisitiza Mkurugenzi Dakawa.

Mafunzo kwaajili ya uboreshaji wa daftari la wapiga kura ya siku moja yanatolewa kwa maafisa waandikishaji, BVR Operators, Wasimamizi ngazi ya kata ambapo katika Halmashauri ya Mji Kondoa zoezi la uandikishaji awamu ya pili litaanza tarehe 2 Mei hadi 4 katika ofisi zote za kata.