Dkt. Mkanachi azindua chanjo ya UVIKO 19 Kondoa

Tarehe iliyowekwa: August 4th, 2021

Mkuu wa wilaya ya Kondoa Dkt.Khamis Mkanachi amewaongoza viongozi wa serikali na sekta binafsi kupata chanjo ya ugonjwa wa UVIKO 19 iliyoanza kutolewa wilayani Kondoa.

Zoezi hilo limefanyika katika Hospitali ya Mji ambapo zoezi la utoaji chanjo kwa maeneo yaliyotengwa linaendelea.

"Ugonjwa wa Corona hauna nasaba na chama, imani yako wala itikadi hivyo ukipata ugonjwa wa Corona ni wewe mwenyewe bila kujali kazi yako wala chama chako,"amesema Dkt.Mkanachi.

Aidha amewataka wananchi kujua kuwa chanjo hii ni hiari wa si lazima na imeletwa kwa kuwa jukumu la kuhakikisha usalama wa afya za wananchi wao ni la serikali hivyo waitumie fursa hiyo kwa kuwa chanjo ni bure.

"Waheshimiwa madiwani najua mna watu wengi kwenye kata zenu mkawahamasishe wajitokeze kupata chanjo na ambao hawataweza kufika hospitali wenyewe ndugu wawasaidie wafike hospitali na wapate chanjo hii muhimu na kuepuka gharama za kulipia mitungi ya gesi kwa ajili ya kuwasaidia kupumua hapo baadae,"amesisitiza Dkt. Mkanachi.

Akiongea awali kabla ya uzinduzi Mwenyekiti wa Chama cha Mapinduzi Wilaya ya Kondoa Mohamed Kova amewataka wananchi kuondoa hofu na kuacha tabia ya kusambaza taarifa zisizo nzuri juu ya chanjo hiyo kwa kuwa kufanya hivyo ni kutenda kosa la jinai.

"Kutochanja si kosa ila kusambaza taarifa za uongo kuhusu chanjo ni uongo hivyo serikali ichukue hatua kwa wote watakao bainika kutenda kosa hilo,"amesisitiza Mhe. Kova

Wilaya ya Kondoa imepokea dozi 6000 ambapo zitatolewa katika Hospitali ya Mji Kondoa, Kituo cha afya Kingale, Zahanati ya Kolo, Kituo afya Busi,Mnenia na Bukulu na kipaumbele kitatolewa kwa viongozi waandamizi, watoa huduma za afya na wazee wenye umri mkubwa.