Kondoa Mjini washukuru Mkurugenzi, Menejimenti kusikiliza na kutatua kero zao

Tarehe iliyowekwa: May 30th, 2024

Wakazi wa kata ya Kondoa Mjini wamempongeza Mkurugenzi na Menejimenti kufika katika kata yao kwaajili ya kusikiliza na kutatua kero zinazowakabili kwa kuwa itasaidia kuwapunguzia changamoto zilizokuwa zinawakabili kwa muda mrefu.

Kauli hiyo wameitoa wakati wa ziara ya kata kwa kata iliyofanyika katika Ofisi ya Kata ya Kondoa Mjini ambapo pia ilihudhuriwa na wataalam mbalimbali wa kata hiyo.

“Naomba nikupongeze Mkurugenzi kwa namna unavyofanya kazi nimekuwa nikikufuatilia kupitia mitandao ya kijamii kweli umekuja kufanyakazi tunaamini kero nyingi zitatatuliwa kupitia wewe,”amesema Ndg. Omary Texas mmoja wa wakazi waliofika katika kata ya Kondoa Mjini

Aidha wakiongea kwa nyakati tofauti wananchi wengi wa kata hiyo wameelezea kero kubwa kwenye masula ya ardhi ambapo Mkurugenzi ameahidi kuzifanyia kazi kero zote kwa kuwapatia taarifa ya utatuzi wa changamoto zao kwa maandishi ili kuepuka migogoro hiyo kujitokeza tena.

Akiongea kwa upande wake Mkurugenzi wa Halmashauri ya Mji Kondoa Ndg. Said Majaliwa amewataka watendaji wote wa Halmashauri kuhakikisha wanatenda haki katika kuwahudumia wananchi ikiwamo kuwajibu barua zao kwa maandishi.

Ameendelea kuwaeleza wananchi kuwa lengo la ziara hiyo ni kusikiliza na kutatua kero zao ambapo wataalam alioongozana nao watatoa ufafanuzi wa masuala mbalimbali na maamuzi yatakayotolewa yatakuwa kwa mujibu wa sheria,kanuni na taratibu.

Hata hivyo amewashauri wananchi wenye kero za migogoro ya ardhi kuwa utatuzi wake hautapingana na maamuzi mbalimbali ambayo yalikwishatolewa na tume mbalimbali zilizoundwa kushughulikia migogoro hiyo awali.

Ziara hiyo katika kata ya Kondoa Mjini itaendelea tena siku ya Jumamosi ambapo Mkurugenzi na Menejimenti wataendelea kusikiliza na kutatua kero za wananchi baada ya baadhi ya wananchi kutohudumiwa leo kutokana na dharula iliyojitokeza na watu zaidi ya 15 wamesikilizwa na baadhi kero zo kutatuliwa zingine zikihitaji muda kidogo kutatuliwa.