Mafundi ujenzi na wanawake wajasiriamali wapigwa msasa mfumo wa NEST

Tarehe iliyowekwa: July 20th, 2024

Mafundi ujenzi zaidi ya thelathini na wanawake wajasiriamali katika Halmashauri ya Mji Kondoa wametakiwa kuhakikisha wanajisajili na kulipia ada ya mfumo wa manunuzi ya serikali ili kupata fursa mbalimbali za kimanunuzi zinazofanywa na Halmashauri.

Mafunzo hayo yamefanyika katika ukumbi wa Halmashauri ya Mji Kondoa na kufunguliwa na Mkurugenzi wa Halmashauri ya Mji Kondoa hivi karibuni.

Akiongea wakati wa kikao hicho Mkurugenzi amewataka washiriki wa kikao hicho kujiamini kwani uwezo wa kufanya kazi wanao yeye atahakikisha wote wanapata kazi zitakazotangazwa na Halmashauri kupitia mfumo wa manunuzi wa serikali ambao unawataka wao kujisajili kwanza.

"Serikali imeleta fedha nyingi za miradi katika Halmashauri Chandimo madarasa, Kingale shule nzima ya ufundi, Gubali mabweni, Bolisa nyumba ya mwalimu, Tura day madarasa, Ula Sekondari madarasa, Unkuku madarasa hapo kweli kuna mtu atakosa kazi kweli ya kufanya ila msipojisajili hamuwezi kupata kazi hizo,"amesema Mkurugenzi Majaliwa

Aidha amewaeleza kuwa mfumo huo umekuja kwa ajili ya kuondoa malalamiko mengi yaliyokuwa yakitolewa na mafundi ya kuombwa rushwa ili wachaguliwe na kupewa kazi kwani kwasasa kila kitu kinafanyika kwenye mfumo hivyo ni vigumu wao kuombwa rushwa.

Hatahivyo amewataka mafundi hao kuwa wawazi kuelezea changamoto zozote wanazokabiliana nazo wakati wa utekelezaji wa miradi katika Halmashauri ya Mji Kondoa ili miradi ikamilike kwa wakati uliopangwa.

Aidha amewataka wanawake wajasiriamali waliojitokeza katika kikao hicho kujiunga katika vikundi na kujisajili katika mfumo wa manunuzi ya serikali ili kupata fursa mbalimbali za kazi zitakazotolewa na Halmashauri.

"Wanawake mna fursa nyingi kwasasa Halmashauri inatarajia kutangaza kazi ya usafi wa ofisi yake na ufagiaji wa barabara ili kuuweka mji katika hali ya usafi sasa ili fursa zisiwapite mjisajili kwenye mfumo huo,"amesisitiza Mkurugenzi Majaliwa

Kwa upande wake Kaimu Mkuu wa kitengo cha Manunuzi Ndg. Emmanuel Wambura amewaambia washiriki hao kuwa milango ipo wazi wakati wowote kwa wote ambao watahitaji msaadavwa kujengewa uwezo katika kujisajili ambapo wengi wamejisajili hivyo wamalizie kulipa ada ya usajili ili wapate fursa zitakazotangazwa.

Kwa upande wao mafundi wameishukuru Halmashauri kwa kuwapatia elimu hiyo na kuahidi kulipia ada ya usajili ili fursa zitakazotangazwa wasizikose a kuomba changamoto walizokuwa wakiabiliana nazo awali zirekebishwe kama ilivyoahidiwa.

Kikao hicho kimefanyika kwa ajili ya kuwajengea uwezo washiriki ambao ni mafundi ujenzi na wazabuni na wanawake wajasiriamali wanaojishughulisha na utengenezaji wa sabuni na usindikaji wa vyakula ambapo kanuni ya manunuzi ya umma 2024 inazitaka taasisi kuwapa fursa watu wa makundi maalum ya vijana, wanawake n watu wenye ulemavu.