RC Senyamule aongoza Wanawake wa Dodoma kuadhimisha siku yao Duniani

Tarehe iliyowekwa: March 8th, 2023

Mkuu wa Mkoa wa Dodoma  Mhe. Rosemary Senyamule ameongoza viongozi wa Kiserikali, Chama, Vyombo vya Ulinzi na Usalam, Taasisi , Mashirika, Dini Pamoja na Wananchi katika kuadhimisha ya siku ya Wanawake Duniani ambapo kimkoa yameadhimishwa katika Wilaya ya Kondoa.

Mhe. Senyamule amewashukuru na kuwapongeza viongozi na wakazi wa Wilaya ya Kondoa kwa maandalizi mazuri waliyoyafanya kwa kuupokea ugeni mzima wa mkoa wa Dodoma katika wilaya hiyo huku akimshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuwa chachu ya mafanikio kwa Wanawake hapa nchini na kuamini kwamba Wanawake wanaweza hata ukiangalia katika uteuzi wake wa viongozi ambapo wanawake wamepewa nafasi kwa kuamini usawa wa Kijinsia.

Hata hivyo, Mhe. Senyamule amewataka wanawake kujitokeza na kuzifanyia kazi fursa mbalimbali ambazo zinatolewa na serikali ili kuweza kufikia malengo ya Usawa wa Kijinsia kwa maendeleo endelevu.

Ameongeza kwa kusema Jamii lazima izingatie haki za watoto wa kike na kumlinda mtoto wa kike dhidi ya ndoa za utotoni ili aweze kufikia na kufaidi huduma za jamii ikiwa ni pamoja na kupata elimu yenye kuwezesha kudai na kumlinda mtoto wa kike dhidi ya Ukatili wa Kijinsia.

Aidha Mkuu wa Mkoa aliwatunuku zawadi wanafunzi mbalimbali wa Wilaya zote za mkoa wa Dodoma waliofanya vizuri kwa kupata ufaulu wa daraja la kwanza  katika mitihani yao ya mwisho ya kidato cha nne mwaka 2022 ikiwa ni pamoja na kuzindua jukwaa la Wanawake na Samia Dodoma.

Maadhimisho ya Siku ya Wanawake Duniani imeadhimishwa duniani kote na katika Mkoa wa Dodoma maadhimisho yamefanyika katika Wilaya ya Kondoa ikipambwa na burudani mbalimbali na kwa mwaka huu yalibeba kaulimbiu isemayo “Ubunifu na Mabadiliko ya Technolojia, chachu katika kuleta Usawa wa Kijinsia.”