"Siasa isiturudishe nyuma kwenye elimu" - Mwenyekiti Kiberenge

Tarehe iliyowekwa: December 3rd, 2024

Mwenyekiti wa Halmashauri ya Mji Kondoa Mhe. Mohamed Kiberenge amewataka wanasiasa na wananchi wa Kondoa kutokubali kurudishwa nyuma  kwa kuingiza mambo ya kisiasa kwenye elimu.

Ameyasema hayo wakati wa kikao cha wadau wa elimu  kilichofanyika katika Ukumbi wa Chuo cha Ualimu Bustani hivi karibuni.

"Tumekutana hapa tujadili namna ya kusonga mbele kwenye elimu kwa kuwa Kondoa yetu inahitaji nguvu kidogo kwenye masuala ya elimu lakini pia wataalam tunaomba mtubainishie changamoto ili tuone tunavukaje hapa kwa pamoja."Amesema Mhe. Kiberenge

Ameongeza kwa kusema kuwa Halmashauri ina walimu wazuri wanaoweza kuivusha  hivyo mijadala itakayotolewa katika kikao hicho iwe ya kujenga na si kubomoa.

Akiwasilisha taarifa ya Utekelezaji wa Mkakati wa Elimu wa Mwaka 2024,  Afisa Elimu ya Awali na Msingi Mwl. Lucy Mbolu amesema Idara imejipanga kuongeza ufaulu kwa kuongeza ufuatiliaji wa taaluma shuleni, kudhibiti utoro na kuhakikisha wanafunzi wanapata chakula shuleni.

"Changamoto zinazotukabili kwa upande wa wazazi ni baadhi yao kutochangia chakula cha wanafunzi,  kutohudhuria vikao vya shuleni na baadhi ya wazazi  kutoruhusu watoto kuhudhuria vipindi rekebishi"amesema Mwl. Mbolu

Wakichangia mada kwa upande wao wajumbe wa kikao hicho wameshauri kata kutunga sheria ndogo ambazo zitawatia hatiani wazazi wanaokiuka sheria hizo na kuwa na tathmini za hali ya taaluma kila baada ya miezi mitatu badala ya kusubiria kipindi cha mwaka mzima.

Kikao cha wadau wa elimu kimefanyika ambapo taarifa za Utekelezaji wa Mkakati wa Elimu wa Mwaka 2024 kwa elimu ya Awali na Msingi pamoja na elimu ya Sekondari zimejadiliwa. Kikao hicho kilihudhuriwa na wadau mbalimbali wakiwemo Waheshimiwa Madiwani, Ofisi ya Mkuu wa Wilaya, Viongozi wa Dini, Wakuu wa Idara na Vitengo, Wathibiti Ubora wa Shule, TSC, CWT, Maafisa Elimu Kata,  Wenyeviti wa Board na Kamati za Shule, Walimu Wakuu na Wakuu wa Shule.