Wafanyabiashara wa nyama watakiwa kufuata taratibu

Tarehe iliyowekwa: September 8th, 2021

Wafanyabiashara ya nyama katika Halmashauri ya Mji Kondoa wametakiwa kufuata taratibu za uendeshaji wa biashara hiyo ili kuepuka kutoa faini ambayo itawaumiza katika biashara yao.

Hayo yamesemwa na Mkurugenzi wa Halmashauri ya Mji Kondoa Paul Sweya wakati wa kikao kazi cha pamoja na wafanyabiashara hao kilichofanyika katika ukumbi wa kituo cha Uwekezaji Kondoa Mjini.

"Tunapofanya biashara tuzingatie masharti ya TMDA wakati mwingine inaumiza sana wanapokuja kufanya ukaguzi na mkabainika kuna makosa mnayo hali inayowapelekea kutoa faini kubwa wakati ni jambo dogo tu la kutimiza masharti sasa tukitoka hapa tukazingatie mapungufu na kuyafanyia kazi,"amesema Mkurugenzi Sweya

Aidha amewataka kufanya biashara na kuzingatia kuwa wao ni watoa huduma hivyo wasiwaumize wananchi katika bei wanazopanga na kuepuka upandishaji holela wa bei ya nyama.

"Sisi ni wamoja tuzingatie uzalendo na tutumie vikao kama hivi ili kujenga ushirikiano miongoni mwetu ili kuepuka kuonekana tofauti na kuwasihi kuwasikiliza na kuwaelewa maafisa kutoka bodi ya nyama ili kupata taratibu mbalimbali na kwenda kuzitekeleza," amesisitiza Mkurugenzi Sweya 

Kwa upande wake Dkt. Ocais Ngilisho kutoka Bodi ya Nyama aliwaeleza wafanyabiashara hao uwepo wa bodi ya nyama na sheria mbalimbali za nyama na umuhimu wake na kazi wanazofanya ikiwepo kutoa adhabu kwa wafanyabiashara wa nyama wanaokiuka sheria ya nyama.

"Sheria inakataza kuuza nyama bila kuwa na kibali kutoka bodi ya nyama na hii ni faida kwetu kwa kuwa unapotambulika inasaidia kuongeza masoko, kutambulika, kufuatiliwa na kuongeza kujiamini katika biashara zenu kwa wateja,"amesisitiza Dkt. Ngilisho

Hata hivyo aliwashauri wafanyabiashara hao ambao hawana vibali kukata vibali na ambao vibali vimeisha kuhuisha vibali vyao na kuwashauri kuunda umoja wao ili kiweza kupata fursa mbalimbali zinazopatikana katika bodi ya nyama ambapo inakuwa vigumu kuzitoa kwa mtu mmoja mmoja.

Akifunga kikao kazi hicho Mkuu wa Idara ya Mifugo na Uvuvi Halmashauri ya Mji Kondoa Monica Kimario amewataka wafanyabiashara hao kwenda kubadilika kwa kujenga mabucha ya kisasa ili kuendana na ukuaji wa mji na kuwa waaminifu katika nyama wanazouza kwa kuhakikisha zimekaguliwa na wataalam wa mifugo.

Kwa upande wao wafanyabiashara hao wameishukuru Halmashauri kwa kuandaa kikao kazi hicho na kuahidi kwenda kuyafanyia kazi waliyoelekezwa na kuomba kupata vikao hivyo vya uelewa mara kwa mara kwani lengo lao ni kihakikisha wanalipa kodi za serikali ili kufanya biashara yao kwa kujiamini.

Kikao kazi kati ya wafanyabiashara wa nyama kimefanyika kwa lengo la kukumbusha taratibu mbalimbali za biashara ya nyama ambapo mada mbalimbali ziliwasilishwa na wataalam wa Idara ya Mifugo na Uvuvi na kuhudhuriwa na wataalam kutoka Bodi ya Nyama Dodoma.