Wasiowapeleka watoto shule, wanaotembea na wanafunzi waonywa

Tarehe iliyowekwa: November 16th, 2023

Wasiowapeleka watoto shule na wanaotembea na wanafunzi katika Wilaya ya Kondoa wametakiwa kuacha tabia hiyo haraka kwani kwa kufanya hivyo wanaongeza idadi ya utoro mashuleni na kuwanyima haki ya elimu watoto na kuua ndoto zao.

Kauli hiyo imetolewa na Mkuu wa Wilaya ya Kondoa Dkt. Khamis Mkanachi wakati wa ziara yake ya kusikiliza kero za wananchi katika kata za Serya na Kingale baada ya diwani wa kata ya kuwasilisha changamoto ya watu wazima kutoka kimapenzi na wanafunzi hivi karibuni.

“Mnaowanyemelea watoto wetu mjiandae tutakwenda kuongea na wanafunzi watutajie wanaotoka nao mtu ukitajwa sheria lazima ichukue mkondo wake na tutakupeleka moja kwa moja mahakamani na hatutakuwa na mswalie mtume katika jambo hilo kwanini msiwafuate watu wazima wenzenu,”amesema Dkt. Mkanachi

Aidha amesema wazazi pia wasiowapeleka watoto shuleni kwa mwaka wa masomo unaotarajia kuanza Januari 2024 wachukuliwe hatua ikiwa ni pamoja na kulipa faini na kuwaagiza watendaji kusimamia jambo hilo ili kila mtoto aliyemaliza darasa la saba anakwenda kidato cha kwanza na anamaliza hadi kidato cha nne.

“Pia wazazi wote wenye watoto mlime na mzalishe chakula cha kutosha na mpeleke chakula shuleni ili watoto wapate chakula shuleni na waweze kusoma kwa utulivu na kuondoa utoro kwa wanafunzi na nawaomba viongozi wa dini mtusaidie katika hili la kumaliza utoro kwa wanafunzi shuleni,”amesisitiza Dkt. Mkanachi

Aidha amewaagiza maafisa ugani wote kuhakikisha wanafanya mikutano na wakulima ili kuwapa utalaam wa namna ya kulima kisasa ili waweze kuzalisha kwa wingi ikiwa ni pamoja na kuhakikisha wanawapatia mbegu na mbolea za ruzuku kwa wakati na kuwahakikishia wananchi kuwa hawatapata tabu tena ya mbolea na mbegu za ruzuku kwani vitafika kwa wakati.

“Lakini pia kwa wakulima nyie nawaomba mhakikishe mnaomba mbolea ya ruzuku kwenye mfumo ambao ndio utaratibu wa sasa muufuate mapema utaratibu huo ili taratibu zingine zifuate ikiwemo kuagiza mbolea na mbegu kutoka kwa wakala mkuu aliyepo mkoani Dodoma,”amesema Dkt. Mkanachi

Wakitoa changamoto zao katika mikutano hiyo Mhe. Kulwa Pazi Diwani kata ya Serya na Mhe. Abushehe Mbuva Diwani kata ya Kingale wamesema kata zao zina changamoto kubwa katika  sekta ya maji na umeme pamoja na kazi kubwa iliyofanywa na serikali katika kuwapatia huduma hizo katika baadhi ya mitaa.

Aidha wamemashukuru Rais Dkt. Samia Suhulu Hassan kwa kuwaletea miradi mingi kwa kipindi kifupi ikiwemo barabara, madarasa, nyumba za walimu, zahanati na vituo vya afya, visima vya maji ambavyo vinangojea kupata fedha kwa ajili ya usambazaji katika maeneo ya watu.

Ziara ya Mkuu wa Wilaya imefanyika katika kata ya Kingale na Serya kwa kuongea katika mikutano ya wananchi ambapo waliwasilisha kero mbalimbali na aliongozana na wataalam kutoka Halmashauri ya Mji na taasisi za kiserikali ikiwa ni muendelezo wa kusikiliza kero za wananchi katika kata zote 29 za Wilaya ya Kondoa ambapo hadi sasa ameshasikiliza na kuzitatua kero za wananchi wa kata 19.