Baraza la Madiwani lajivunia mafanikio kipindi cha miaka mitano

Tarehe iliyowekwa: April 30th, 2025

Baraza la Waheshimiwa Madiwani Halmashauri ya Mji Kondoa limejivunia mafanikio katika nyanja mbalimbali kwa kipindi cha miaka mitano madarakani.

Hayo yamebainishwa na Mwenyekiti wa Halmashauri ya Mji Kondoa Mhe. Mohamed Kiberenge wakati wa  kikao cha kujadili taarifa za robo ya tatu kwa mwaka wa Fedha 2024/25.

Amesema kuwa katika kipindi hicho Waheshimiwa Madiwani wamesimamia fedha zote za miradi zilizoletwa na Serikali kuu, wahisani na mapato ya ndani ambapo miradi yote imekamilika kwa wakati na viwango.

"Kiukweli ni katika kipindi hiki tumeona mapato ya ndani yakitolewa kwenda kutekeleza miradi na Waheshimiwa ni mashahidi kwa kuwa kata zote zimepata fedha za mgao ili kutekeleza miradi katika maeneo yetu na miradi mingine ipo katika hatua za ukamilishaji.

Kwa upande wake mwakilishi wa Katibu Tawala Mkoa wa Dodoma Ndg. Erick Ntikahela amewapongeza Waheshimiwa madiwani kwa kuwa baraza lenye utulivu ambapo mkoa unajivunia uwepo wa baraza hilo.

"Niwapongeze baraza limetulia na limeimarika sana tofauti na ilivyokuwa mwanzo nina imani mtarudi tena kama mlivyo na mkawa baraza bora kwa kuwa mna uzoefu kamili"amesema Erick

Akiongea Katibu Tawala Wilaya ya Kondoa Ndg. Christina Kalekezi amewapongeza Waheshimiwa kwa usimamizi wa bilioni 18 za miradi ya maendeleo  kwa kipindi chao chote.

" Waheshimiwa Madiwani mmesimamia fedha za ujenzi wa madarasa, mabweni, ukarabati wa hospitali ya wilaya, ujenzi wa ofisi za mitaa na utoaji wa asilimia 10 kwa vikundi kwa kweli mnastahili pongezi nyingi"amesema Katibu Tawala.

Naye Kaimu Mkurugenzi Halmashauri ya Mji Kondoa Ndg. Sekela Mwasubila amewasihi Waheshimiwa Madiwani kwenda kuhamasisha wananchi kujitokeza wakati wa uwekaji wazi wa Daftari la kudumu la wapiga kura na uboreshaji wa taarifa kwa awamu ya pili utakaoanza tarehe 16-22 Mei, 2025 ili wananchi wapate fursa ya kuchagua viongozi wakati wa Uchaguzi Mkuu utakaofanyika Oktoba 2025.

Baraza la Waheshimiwa Madiwani limefanyika kujadilibtaarifa za robo ya pili ambapo limehudhuriwa pia na Kamati ya Usalama, Katibu wa CCM, Wakuu wa Idara na vitengo na wananchi.