Halmashauri ya Mji Kondoa yatoa milioni 155 kwaajili ya mikopo

Tarehe iliyowekwa: April 8th, 2023

Halmashauri ya Mji Kondoa imetoa shilingi milioni 155 ikiwa ni mikopo isiyo na riba kwa vikundi vya wanawake, vijana na watu wenye ulemavu hadi kufikia mwezi Machi 2023 kwa mwaka wa fedha 2022/2023.

Fedha hizo zimetolewa kwa vikundi ikiwa ni fedha taslimu, bajaji na pikipiki ambapo vikundi hivyo vinajishughulisha na biashara mbalimbali ndani ya Halmashauri ya Mji Kondoa.

Hafla ya makabidhiano ya mikopo hiyo imefanyika katika viwanja vya Halmashauri ya Mji Kondoa ambapo mgeni rasmi alikuwa ni Mwenyekiti wa Halmashauri ya Mji Kondoa Mhe. Mohamed Kiberenge.

Akiongea katika halfa hiyo Mhe. Kiberenge amewataka wanufaika hao kwenda kutumia fedha hizo kwa malengo aliyojiwekea na waliyowasilisha katika maandiko yao wakati wanaomba .

Aidha aliwataka wanufaika hao kufanya marejesho kama walivyokubaliana ili waombaji wengine waombe na kufanya nao shughuli zitakazowaletea kipato na kuwawasisitiza kwenda kuwa mabalozi kwa wengine ili watumie fursa hiyo ya kupata mikopo isiyo na riba.

Kwa upande wa wanufaika wa mikopo hiyo wameishukuru Halmashauri ya Mji Kondoa kuwapatia mikopo hiyo ambayo itawasaidia kujiletea maendeleo na kuahidi kurejesha kwa wakati.

Halmashauri ya Mji Kondoa imetoa zaidi ya shilingi milioni 150 kwa kipindi cha kufikia mwezi Machi ambapo katika fedha hizo wamenunua pikipiki 4 na bajaji 1 na kuwakabidhi wanufaika ambao waliomba mkopo kwa kipindi hicho ambapo zoezi zima limesimamiwa na Divisheni ya Maendeleo ya Jamii.