Idara ya Afya watakiwa kufanyakazi kwa Uaminifu

Tarehe iliyowekwa: January 7th, 2021

Mkurugenzi Halmashauri ya Mji Kondoa Msoleni Dakawa amewataka watumishi wa afya katika hospitali ya mji Kondoa kufanya kazi kwa uadilifu na nidhamu wanapowahudumia wananchi.

Kauli hiyo ameitoa wakati wa kikao na watumishi wa Idara ya Afya katika kilichofanyika katika ukumbi wa hospitali ya Mji Kondoa hivi karibuni.

“Watumishi wote ni wangu njooni mnione ofisini mnapokutana na changamoto tuache kufanya kazi kwa kunyanyasana na kukatishana tamaa ishini kwa kuheshimiana kila mmoja ana umuhimu wake kwa wakati wake na nafasi aliyonayo hakuna mkubwa”,amesema Mkurugenzi Dakawa.

Halikadhalika Mkurugenzi Dakawa ameendelea kusema kuwa Idara ya Afya ni idara kama zilivyo idara nyingine na kazi zote wanazozifahya ni za Halmashauri na serikali yetu hivyo ni lazima kila mmoja afanye kazi kwa juhudi na nidhamu ili kuwahudumia wananchi.

“Mnawahudumia watu wa kila aina na wengine hamuwafahamu acheni kuchukua rushwa toka kwa wagonjwa ridhikeni  na mnnachokipata na kukitumia vizuri, ukiwa zamu wajibika piteni wodini na kuona changamoto ninawahitaji sana kazini ndio maana ninasema haya”,alisisitiza Mkurugenzi Dakawa.

Hata hivyo Mkurugenzi Dakawa amesisitiza kuweka utaratibu mzuri wa kudhibiti magari ili yaweze kudumu kwa muda mrefu na kuwataka watumishi kuongeza ujuzi na maarifa kwa kusoma vitabu na vyuoni ili kujiendeleza kitaaluma na kiujuzi kwani dunia inabadilika kila siku.

Kikao na watumishi wa Idara ya Afya kimefanyika ili kuweza kujadili na kutatua changamoto zinazojitokeza katika Idara ya Afya ambapo kilihudhuriwa na Mkurugenzi Halmashauri Mji Kondoa ambaye aliwaahidi kuendelea kuboresha mazingira ya kufanyia kazi, pia kilihudhuriwa na Mganga Mkuu, Maafisa Utumishi, pamoja na watumishi wa Idara ya Afya.