Kamati ya Fedha wapongeza mapato ya ndani kutekeleza miradi ya maendeleo

Tarehe iliyowekwa: April 18th, 2025

Kamati ya Fedha na Utawala Halmashauri ya Mji Kondoa imempongeza Mkurugenzi kwa kupelekeka fedha kiasi cha shilingi milioni 198 zitokanazo na mapato ya ndani kwenye utekelezaji wa miradi ya maendeleo ambayo itawasaidia wananchi kupata huduma muhimu kwa ukaribu.

Hayo yamesemwa na Mwenyekiti wa Halmashauri ya Mji KondoaM he. Mohamed Kiberenge wakati wa ziara ya ukaguzi wa miradi robo ya tatu ambapo kamati hiyo ilitembelea miradi mbalimbali ili kuona utekelezaji wake ambapo pia waliongozana na Wakuu wa Idara.

“Mapato yetu ni kidogo lakini mmepambana kuhakikisha fedha zinapelekwa kwenye miradi tunawapongeza sana lakini pia tunashauri muongeze usimamizi kuhakikisha fedha zote zilizotolewa zinatekeleza kazi iliyokusudiwa na miradi inakamilika kwa wakati uliopangwa,”amesema Mhe. Kiberenge

Aidha ameshauri kuendelea kupeleka fedha kwenye miradi viporo ili ikamilike badala ya kuanza utekelezaji wa miradi mipya na kuwashukuru watumishi kwa ushirikiano wao wakati wa utekelezaji wa miradi ambayo mingi imekamilika na ipo katika viwango vizuri na ana Imani iradi hiyo itakamilika kwa wakati.

Wakiongea kwa katika miradi ya Suruke na Amali Kingale wajumbe wa kamati ya fedha wamepongeza kasi ya utekelezaji wa miradi hiyo na hatua iliyofikiwa na kushauri wasimamizi kufuata taratibu zote za manunuzi wakati wa utekelezaji wa mradi na kuepuka kuzalisha madeni.

Kwa upande wake Mkurugenzi wa Halmashauri ya Mji Kondoa Ndg. Said Majaliwa ameishukuru kamati kwa ushauri wao na kuwahakikishia kuwa miradi yote itakamilika kabla ya mwisho wa mwaka wa fedha kukamilika na kuendelea kupeleka fedha kwenye miradi iliyosalia kama ilivyopangwa kwenye bajeti ya mwaka wa fedha 2024/2025.

“Mhe. Mwenyekiti wa wajumbe wote niwahakikishie kuwa miradi hii itakamilika kwa wakati na hakuna mradi ambao utavuka na fedha ukiacha miradi michache ambayo kuna marekebisho ya vifungu na tumeambiwa itawekwa kwenye bajeti ijayo lakini mingine yote itakamilika kwa wakati,”amesisitiza Mkurugenzi Majaliwa

Kamati ya Fedha na Utawala imefanya ukaguzi wa miradi kwa robo ya pili ambapo imekagua miradi ya ujenzi wa Sekondari Suruke, Shule ya Amali Kingale, nyumba ya  mganga Zahanati ya Kichangani, Ofisi ya Mtaa wa Tumbelo, Zahanati ya Mulu na umaliziaji wa Ofisi ya Mtaa Wis kwa Ntisi.