Kamati ya siasa mkoa yaridhishwa na ujenzi Bolisa Sekondari

Tarehe iliyowekwa: November 13th, 2023

Mwenyekiti wa Jumuiya ya wazazi na Mjumbe wa kamati ya siasa Chama cha Mapinduzi mkoa wa Dodoma Ndg. Samweli Malecela amesema kamati ya siasa mkoa imeridhishwa na ujenzi wa Shule ya Sekondari Bolisa na  amewapongeza viongozi wa Halmashauri ya Mji Kondoa kwa usimamizi mzuri wa mradi huo.

Pongezi hizo amezitoa wakati wa ziara ya ukaguzi wa miradi iliyofanywa na kamati ya siasa mkoa wa Dodoma ikiwa imeongozana na kamati ya siasa ya Wilaya ya Kondoa na wakuu wa divisheni na vitengo wa Halmashauri ya Mji Kondoa.

Aidha amesema awali majengo mazuri kama ya Sekondari yalikuwa yanaombewa kuwa chuo kwa watu kudhani wanafunzi wa vidato vya chini hawastahili kuwa na majengo mazuri lakini serikali ya awamu ya sita imefanya mapinduzi na sasa shule zote zinamuonekano mzuri na wameweka nia ya kuhakikisha kila mtoto anasoma mazingira mazuri kama ya shule ya Sekondari Bolisa.

Aidha ameutaka uongozi wa Halmashauri kuhakikisha fundi nayejenga maabara anasimamiwa na anamaliza mapema maeneo yaliyobakia ili wakati ukifika shule hiyo ianze kuchukua wanafunzi kama ilivyopangwa.

Aidha ameongeza kuwa amelichukua ombi la Mwenyekiti wa Chama cha Mapinduzi wilaya ya Kondoa Mhe. Hija Sulu la kuomba kujengewa shule ya sekondari katika kata ya Suruke ikiwa ndio kata pekee iliyobakia kuwa na sekondari na kuwataka kuendelea kuwaza kujenga shule ya kidato cha tano na sita.

Akiongea katika eneo la mradi diwani wa kata ya Bolisa Mhe. Ramla Abeid ameishukuru Serikali ya awamu ya sita kwa kuwaletea mradi huo ambao ulikuwa hitaji kubwa la wananchi  wa kata hiyo kwa kuwa watoto wao walikuwa wanatembea umbali mrefu hadi Gubali Sekondari kufuata elimu ya Sekondari.

“Pia namshukuru sana Rais Mhe. Samia Suluhu Hassan kwa kuendelea kuipa miradi kata ya Bolisa ambapo pia nimeambiwa ameleta shilingi milioni 69 kwa ajili ya ujenzi wa madarasa matatu ambao haujaanza  katika Shule ya Sekondari Gubali ambayo inalelewa na kata hii ya Bolisa hatuna cha zaidi cha kumpa zaidi ya shukrani,”amesema Mhe. Ramla

Kwa upande wake Mkurugenzi wa Halmashauri ya Mji Kondoa Ndg. Paul Sweya amewashukuru viongozi wa chama ngazi ya mkoa na wilaya kwa kufanya ziara katika mradi huo kwani kwa kufanya hivyo kunawasaidia kuona makosa ambayo wenyewe hawawezi kuyaona na kuahidi kuufanyia kazi ushauri walioutoa na kukamilisha ujenzi kwa wakati kama ilivyokusudiwa.

Shule ya Sekondari Bolisa ilianza ujenzi mwezi Agosti baada ya kupokea fedha kutoka Serikali kuu zaidi ya shilingi milioni 540 kwa ajili ya ujenzi wa madarasa7, maabara 3, jengo la ICT, maktaba, jengo la utawala, matundu 10 ya vyoo na hadi sasa zaidi ya shilingi milioni 530 na kukamilika kwake kutawapunguzia umbali wanafunzi kutembea zaidi ya kilomita 8 kufuata elimu ya Sekondari.