Kamati ya Ushauri ya Wilaya yakutana kujadili mpango na bajeti ya mwaka 2025/2026

Tarehe iliyowekwa: January 25th, 2025

Kamati ya Ushauri ya Wilaya ya Kondoa imekutana na kujadili mpango na bajeti ya Halmashauri ya Mji Kondoa kwa mwaka wa fedha 2025/2025.

Kikao hicho kimeongozwa na Mkuu wa Wilaya ya Kondoa Mhe. Fatma Nyangasa kimefanyika katika ukumbinwa mikutano wa Halmashauri ya Mji Kondoa.

Akiongea katika kikao hicho Mhe. Fatma amewapongeza watumishi wa Halmashauri ya Mji Kondoa wakiongozwa na Mkurugenzi kwa usimamizi mzuri wa fedha zinazoletwa na Serikali na kuwataka kuendelea kusimamia ili zitimize malengo ya Serikali.

Aidha amewataka kuhakikisha kuwa wanaendelea kubuni vyanzo vipya vya mapato ikiwa ni pamoja na kuangalia vyanzo ambavyo vipo nyuma ili kuina namna ya kuweka njia sahihi ya kukwamua changamoto za kutofikia malengo ya ukusanyaji.

"Bajeti ni nzuri hivyo tukafanye kazi ili dira yetu ya Halmashauri inavyosema na tukue kimapato na kuimarisha uchumi wa wananchi" amesisitiza Mhe.Fatma

Kwa upande wake Mkurugenzi wa Halmashauri ya Mji Kondoa Ndg.Said Majaliwa amewashukuru wajumbe kwa michango yao na kuahidi kuufanyia kazi ushauri uliotolewa kwa maendeleo ya wanakondoa.

"Ushauri wenu tumeuchukua tutaona namna ya kuufanyia kazi na wataalam na ndio maana ya kukaa nanyi wajumbe wa kikao hiki ili kushauri sehemu ambayo sisi hatukuona,"amesisitiza Mkurugenzi Majaliwa

Afisa Mipango wa Halmashauri ya Mji Kondoa Ndg. Damas Masanja amesema kwa kipindi cha mwaka 2025/2026 Halmashauri imepanga kukusanya shilingi bilioni 22,268,656,964.31 kutoka vyanzo vya ndani, ruzuku kutoka Serikali kuu na wahisani.

Kikao cha Ushauri Wilaya kimeketi kwa ajili ya kujadili mpango na bajeti 2025/26 ikiwa ni kwa mujibu wa Sheria ili kupata maoni ya wadau mbalimbali na kimehudhuriwa na Kamati ya Usalama, Mwenyekiti wa Halmashauri, mbunge wa Kondoa Mji Mhe. Ally Makoa, Wakuu wa Idara na Vitengo, viongozi wa dini, Wakuu wa Taasisi, Wawakilishi wa Vyama vya Siasa, Maafisa Tarafa na Watendaji wa Kata.