"Kingale Shirikianeni"- Dkt. Binilith

Tarehe iliyowekwa: September 3rd, 2018

Mkuu wa mkoa wa Dodoma Dkt.Binilith Mahenge amewataka wananchi wa Kata ya Kingale kushirikiana pamoja katika ujenzi wa Kituo cha Afya Kingale kwani huduma itakayotolewa itawanufaisha wote.

Aliyasema hayo wakati wa ziara yake katika kata ya Kingale eneo linalojengwa kituo cha Afya na kufanya mkutano wa hadhara hivi karibuni.

"Fedha zinetolewa Na Rais Dkt John Magufuli kwa ajili ya kuboresha huduma za afya jambo ambalo litawapunguzia umbali wa kufuata huduma mjini kwa kumuunga mkono Rais shirikianeni kukamilisha kituo hiki."Alisema Dkt. Mahenge

Aliongeza kwa kuwataka viongozi wa mitaa ambayo haijachangia kwenda kuitisha mikutano Na kuwahamasisha wananchi kuchangia ujenzi kama mitaa mingine kwani ugonjwa ukija hauangalii chama, urefu wala kabila la mtu.

Awali akiongea katika mkutano huo Mkuu wa Wilaya ya Kondoa Mhe.Sezaria Makota alisema kuwa wananchi wa Kingale ni wapenda maendeleo Na ni moja ya kata zinazoongoza katika elimu na uchangiaji wa CHF na juhudi zao zimeonekana katika ujenzi wa kituo cha afya ambapo wameshachangia tofali, mchanga na mawe ambavyo vipo eneo la ujenzi tayari.

Kwa upande wake Mwenyekiti wa kamati ya ujenzi Issa Ramadhan alisema kuwa mradi huo uliibuliwa na na wananchi na jumla ya majengo matano yatajengwa ikiwemo nyumba ya mganga ambapo serikali imetoa jumla ya shilingi milioni 400 na wananchi wanatarajia kukusanya jumla ya shilingi milioni 15 na hadi sasa wamechangia shilingi milioni 11.

Mkuu wa mkoa wa Dodoma amefanya ziara katika wilaya ya Kondoa ikiwa ni mwendelezo wa ziara yake ya kutembelea wilaya za mkoa wa Dodoma ambapo Kondoa alikagua miradi ya maendeleo na kuahidi kutoa shilingi milioni moja na nusu na kuchangisha shilingi milioni moja na laki nne kutoka kwa viongozi wa serikali alioongozana nao kwenye ziara yake kuunga mkono nguvu za wananchi wa Kingale.