Kondoa Mji na Zimamoto watoa elimu ya matumizi ya nishati safi Hachwi

Tarehe iliyowekwa: March 29th, 2025

Halmashauri ya Mji Kondoa  kupitia kitengo Cha Maliasili na Uhifadhi wa Mazingira kwa kushirikiana na Jeshi la Zimamoto na Uokoaji Kondoa  wametoa elimu ya matumizi ya nishati safi kwa wananchi wa Mtaa wa Hachwi  Ili kuondokana na changamoto kadhaa ambazo hujitokeza pindi wananchi  wanapotumia nishati isiyo safi ikiwemo nishati ya mkaa pamoja na kuni.

Afisa Maliasili Halmashauri ya Mji Kondoa Ndg. Ramadhan Hamis amewaasa wananchi wa Hachwi kutumia Nishati Safi Ili kutunza mazingira pamoja na kutunza afya zao kwani moshi wa kuni unaleta athari katika mwili wa binadamu.

Ramadhan ameongeza kuwa licha ya matumizi ya kuni kuwa na athari kiafya pia  muda mwingi unatumika kutafuta kuni hizo wakati muda huo ungetumika kufanya shughuli zingine za kiuchumi.

Kwa upande wake Afisa Zimamoto na Uokoaji Maria Kinyaiya amesema kuwa wananchi wanatakiwa kuweka nishati ya gesi mbali na viashiria vya moto kama vile jiko la mkaa na vifaa vingine vya kulipuka.

Afisa huyo  amewaasa akina mama kuandaa vifaa hususani kiberiti kabla ya kuwasha mtungi wa gesi na sio kufungulia gesi Kisha kuwasha kiberiti hivyo amewasihi akina mama kuwasha kwanza kiberiti Kisha kuwasha gesi Ili kuepuka mlipuko ambao unaweza kutokea endapo gesi hiyo  ilikuwa inavuja.

Nae Afisa Utumishi wa Halmashauri ya Mji Kondoa Ndg. Thobias Mmari amewaasa wananchi wa Hachwi kumiliki vifaa mbalimbali kwa ajili ya kuzimia moto Ili kuweka salama mali mbalimbali ambazo wananchi wanazimiliki.

Matumizi ya Nishati salama kwa watanzania wote ni ajenda ya Rais wa Tanzania Mhe.Dkt.Samia Suluhu Hassan Ili kuhakikisha watanzania wote wanatumia nishati hiyo kwa ajiri ya kulinda afya zao lakini pia kutunza mazingira.