Kondoa Mji wapongezwa kulipa deni la Madiwani

Tarehe iliyowekwa: June 3rd, 2020

Katibu Tawala Mkoa wa Dodoma Kessy Maduka ameupongeza uongozi wa Halmashauri ya Mji Kondoa kwa kulipa deni la Waheshimiwa madiwani na kupelekea Halmashauri hiyo kubakia na deni la miezi miwili.

Pongezi hizo alizitoa wakati wa baraza maalum la kupitia na kujadili taarifa ya utekelezaji wa mapendekezo yaliyotolewa na Mdhibiti na Mkaguzi Mkuu wa Hesabu za Serikali za Mitaa katika ukaguzi wa hesabu za mwaka wa fedha 2018/2019 kilichofanyika katika ukumbi wa Kondoa Irangi hivi karibuni.

“Mkuu wa Mkoa anaiunga mkono Halmashauri ya Mji Kondoa na ameniagiza niseme kuwa ni moja ya Halmashauri ambazo hana shida nazo maana mmeshaweza kujiongoza wenyewe na kulipa deni la waheshimiwa madiwani kwa wakati ambapo katika mkoa ni halmashauri tatu tu zilizofikia hatua hiyo,”alisema Kessy

Aidha aliongeza kuwa mafanikio hayo yametokana na mshikamano katika ukusanyaji mapato na kupelekea kuthubutu kupandisha mapato mara dufu ambapo ni halmashauri chache sana zenye kufanya uthubutu huo.

Hata hivyo alitilia mkazo mambo mbalimbali ili kuboresha zaidi utendaji kazi kwa kuimarisha masuala ya mapato ya ndani na vyanzo vyake, kulipa madeni ya watumishi, kusimamia kesi za halmashauri kwa ukaribu ili kulinda mali za serikali zisipotee na kuyaandikia taarifa magari chakavu ili TEMESA wayakague na kuuzwa ili kununua magari mengine.

Akiongea  Mwenyekiti wa Halmashauri ya Mji Kondoa Mhe. Hamza Mafita alimshukuru Katibu Tawala kwa pongezi alizozitoa na kumuahidi kuendelea kufanyakazi kwa umoja na mshikamano ili kuhakikisha wananchi wote wanapata huduma na kwa wakati.

“Tutamaliza deni letu kwa wakati tumebakisha miezi miwili fedha inayolipwa ndani ya wiki hii na mafanikio hayo yametokana na mshikamano uliopo kati ya Wakuu wa Idara, Mkurugenzi. Waheshimiwa madiwani na Mkuu wa Wilaya na panapotokea tofauti tunakaa chini na kuzimaliza kwa hoja,”alisisitiza Mhe. Mafita

Kwa upande wake Mdhibiti na Mkaguzi wa Hesabu za Serikali kwa Mkoa wa Dodoma Sesemka Chambi aliipongeza Halmashauri kwa kupata hati safi kwa miaka mitatu mfululizo na kuwashauri kutobweteka ila kuendelea kuzitetea kwa kuhakikisha wanafuata sheria, taratibu na kanuni za fedha ili kuepukana na kupata hati chafu hapo baadae.

Baraza maalum la Waheshimiwa Madiwani liliketi kwa ajili ya kujadili taarifa ya utekelezaji wa mapendekezo yaliyotolewa na Mdhibiti na Mkaguzi Mkuu wa Hesabu za Serikali za Mitaa katika ukaguzi wa hesabu za mwaka wa fedha 2018/2019 na kupelekea Halmashauri kupata hati safi kwa mwaka wa tatu mfululizo na lilihudhuriwa na Katibu Tawala Mkoa, Katibu Tawala Msaidizi anayeshughulikia Serikali za mitaa, Kamati ya Ulinzi na Usalama, viongozi kutoka Ofisi ya Mdhibiti na Mkaguzi Mkuu wa Serikali Dodoma na Wakuu wa Idara.