Kondoa Washukuru Mradi wa SAUTI

Tarehe iliyowekwa: October 17th, 2018

Kaimu Mkurugenzi wa Halmashauri ya Mji Kondoa Kaunga Amani amewashukuru viongozi wa mradi wa SAUTI  kwa kutambulisha mradi huo katika mji wa Kondoa kutokana na kasi kubwa ya ukuaji wa mji huo.

Pongezi hizo alizitoa wakati wa kikao cha kutambulisha mradi huo kwa watumishi wa idara ya afya wa halmashauri ya Mji wa Kondoa na Halmashauri ya Wilaya ya Kondoa katika ukumbi wa jengo la biashara Kondoa Mjini.

Alisema kuwa Mji wa Kondoa unakua kwa kasi kubwa hivyo kuleta mradi huo wa kuwafikia watu walio kwenye hatari ya kuambukizwa Virusi Vya Ukimwi  na kuwafanya wakatambua hali zao ni jambo jema sana kwani itasaidia sana katika kupunguza kasi ya kuenea kwa ugonjwa wa Ukimwi katika mji mdogo wenye mwingiliano mkubwa wa watu.

“Nashauri msiishie katika kuyafikia makundi hayo tu bali kwa pamoja tutengeneze mazingira ya kuhakikisha wanaogundulika na maambukizi hawasambazi maambukizi mapya kwa watu wengine ili kuunga mkono jitihada za serikali za kufikia tisini tatu katika kutokomeza ugonjwa wa Ukimwi”. Alisema Kaunga

Aidha aliwataka waganga wakuu wa halmashauri zote za Kondoa kuonyesha ushirikano kwa wadau hao wa afya ili kuhakikisha lengo la mradi linafikiwa na kuwasihi timu ya mradi kufika ofisi ya mkurugenzi wanapokumbana na changamoto katika kazi zao ili waweze kutatua kwa pamoja.

Akiongea Meneja wa Mradi wa SAUTI Dr. Raymond Bandio amesema mradi huo umeletwa Kondoa ili kuyafikia makundi yaliyo katika hatari ya kuambukizwa  Virusi Vya Ukimwi  kwa kutoa ushauri nasaha na kupima Virusi vya Ukimwi ikiwa ni pamoja na kugawa kondomu ili kupunguza kasi ya maambukizi mapya.

“Tumelenga kuzifikia 90 mbili kati ya tatu za mkakati wa serikali wa kuzifikia 90 tatu katika mapambano dhidi ya Ugonjwa wa Ukimwi ambapo  tutahakikisha watu  wanatambua hali zao kiafya na wataokutwa na maambukizi tutahakikisha wanaanza kutumia dawa za kufubaza Virusi Vya Ukimwi  na hatuchagui maeneo ya kazi tutafika majumbani, nyumba za starehe na sehemu za maofisini ili kutoa huduma.” Alisisitiza Dr. Raymond

Aliongeza kwa kuzitaja kata ambazo zitapata huduma hiyo katika halmashauri ya Mji Kondoa kuwa ni Chemchem, Kingale na Kondoa Mjini ambapo katika halmashauri ya wilaya ya Kondoa huduma hii itatolewa katika kata za Pahi, Bumbuta, Busi, Changaa, Haubi, Itaswi, Kalamba, Kikore, Kisese,Kwadelo na Mnenia.

Mradi wa SAUTI umeanza kazi ya kuyafikia makundi maalum yaliyo katika hatari ya kuambukizwa Virusi Vya Ukimwi  katika Wilaya ya Kondoa kuanzia mwezi Oktoba mwaka huu hadi Septemba mwakani ambapo wamejiwekea malengo ya kuwafikia watu 10,863 ikiwemo 7,010 watu wazima, 3853 watoto aidha imejipanga kuwafikia WAVIU 1998 na 90 watoto wenye maambukizi ya Virusi vya Ukimwi na kuhakikisha wagonjwa 1898 wanaunganishwa na huduma za CTC.