Kotumo watakiwa kutokatishwa tamaa ujenzi wa Zahanati

Tarehe iliyowekwa: May 4th, 2021

Mkurugenzi wa Halmashauri ya Mji Kondoa Msoleni Dakawa amewataka wananchi wa Kotumo katika Mtaa wa Hachwi kutokatishwa tamaa na mtu yoyote asiyependa maendeleo katika utekelezaji wa mradi wa ujenzi wa Zahanati unaoendelea katika eneo lao. 

Ameyasema hayo wakati wa mkutano wa wananchi wa kata uliofanyika katika eneo la Kotumo na kuhudhuriwa pia na Mheshimiwa diwani wa kata ya Kolo.

"Kondoa ni wilaya ya zamani sana imeanza pamoja na Nairobi lakini ukifananisha ni vitu tofauti utaona sisi tumechelewa sana na hii inawezekana kabisa kuna watu walisababisha turudi nyuma sasa watu hao tuwakatae kabisa wale wanaotaka kutuletea maendeleo tuambatane nao kwasababu tunataka maendeleo,"amesema Mkurugenzi Dakawa.

Aidha ameongeza kuwa si jambo jema kuona mama mjamzito au mzee atoke katika milima yote hii aende akatibiwe Bolisa au Kolo na wao wakashindwa kujenga Zahanati jambo ambalo si jema na kuwapongeza wananchi hao kwa kuanza kujenga Zahanati ikiwa wananchi wengine wakijitoa kujenga.

"Nimeambiwa kuwa hapa kuna mgogoro mkubwa kuwa kuna Warangi na Wasi na mmesahau kuwa sisi wote ni watanzania na Hayati Mwalimu Nyerere aliweza kutuunganisha makabila yote tukawa kitu kimoja bila hivyo tusingeweza kuja kufanyakazi Kondoa kwa kuwa si wenyeji wa Kondoa lakini tumekuja kwa kuwa wote ni pamoja," amesisitiza Mkurugenzi Dakawa

Hata hivyo amewasihi wananchi hao kushirikiana kwa pamoja katika kukamilisha Zahanati hiyo na kutokubaliana na mtu yoyote atakayetaka kuwarudisha nyuma na kuwataka kutokata tamaa ndio maana amefika kuwatia moyo katika jambo lao la maendeleo na kuacha wasiopenda maendeleo wapige kelele na wao wawajibu kwa vitendo kwa kufanya kazi.

"Nakuagiza Mtendaji wa kata kuwafikisha katika baraza la kata wananchi wote ambao hawatatoa mchango na watozwe faini ambazo pia ziletwe kuchangia katika mradi huu na tunafanya hivi kwa kuwa jambo hilo lipo kisheria,"amemaliza Mkurugenzi Dakawa

Akiongea Mheshimiwa Diwani wa kata ya Kolo Mhe. Idd Ng'ungu ameishukuru serikali kwa kuwaletea fedha za ujenzi wa Zahanati pamoja na ujio wa Mkurugenzi na wataalam wake ambapo pia amewataka wananchi kutokata tamaa kwa kuwa wapo pamoja katika ujenzi huo hadi utakapokamilika.

Naye mwakilishi wa wananchi Salimu Bura ameahidi kuwa mradi utakamilika kwa wakati kwa kuwa wananchi wote wa Kotumu ujenzi huo kwao ni kama mboni ya jicho kutokana na shida wanazopata kufuata huduma za afya.

Ziara ya kuhamasisha utekelezaji wa maendeleo imeanza leo ambapo Mkurugenzi na wataalam mbalimbali wanafanya mikutano ya mitaa mbalimbali kuwahamasisha wananchi kujitoa katika utekelezaji wa miradi ambapo serikali imetoa zaidi ya shilingi milioni 800 kwa ajili ya utekelezaji wa miradi ya afya na elimu katika kata zote nane za Halmashauri ya Mji Kondoa.