Madaktari bingwa wawashauri wananchi kuchunguza afya mapema

Tarehe iliyowekwa: March 5th, 2023

Wananchi wa Halmashauri ya Mji Kondoa na maeneo ya jirani wameshauriwa kuwa na mwamko wa kufanya uchunguzi wa afya zao mapema ili wanapogundulika na tatizo waweze kuanza tiba mapema.

Ushauri huo umetolewa na Dkt. Peleus Kato kwa niaba ya madaktari bingwa waliofika katika Hospitali ya Mji Kondoa kutoa huduma za matibabu kwa muda wa wiki moja hivi karibuni.

“Wananchi wengi wanagundua ugonjwa wakati umefika mbali sana hali inayopelekea kuwa vigumu kupata matibabu na hii inachangiwa na kuwa wengi wetu hatuna utamaduni wa kupima afya zetu mapema tunakuja kushtuka hatua ambayo usumbufu wa ugonjwa umeanza.”Amesema Dkt. Kato

Aidha amesema katika kipindi chote walichokuwa wakitoa huduma mwitikio wa wananchi umekuwa ni mzuri na wamefanikiwa kutoa huduma zote muhimu ikiwemo ushauri, matibabu na kufanya upasuaji kwa waliokidhi vigezo na ambao wamegundulika na matatizo zaidi kulingana na mazingira wamepewa rufaa ya kwenda Hospitali ya Rufaa ya Dodoma kwa matibabu zaidi.

“Tutawasiliana na uongozi wa Hospitali tumeona matatizo kwa akinamama ambako foleni ni kubwa hivyo tutaona jinsi gani ya kufanya ili angalau kliniki kama hizi zisiwe zinakaa kipindi kirefu bila kufanyika  zinaweza kupangiwa wataalam wachache wakawa wanakuja ili kuwasaidia wananchi,”amesisitiz Dkt. Kato

Kwa upande wake Ndg. Salehe Kadete Kaimu Mganga Mkuu amewashukuru madaktari hao kwa ujio wao kwani wamesaidia kwa kiasi kikubwa kwani wananchi wengi hawana uwezo wa kumudu gharama za kufika Dodoma kwa ujio wao wamewasogezea huduma hivyo wamewapunguzia gharama kwa kiasi kikubwa.

“Hata hivyo pamoja na kusogeza huduma lakini pia mmewajengea uwezo watumishi wetu naamini kuna vitu vipya vingi wamejifunza wao wanafanya kazi hapa kila siku hivyo wakati mwingine wanafanya kwa mazoea na kwasasa mambo yanabadilika kila siku hivyo wataongeza utaalam na tutarajie kuona ufanisi ukiongezeka,”amesisitiza Kadete

Akiongea awali Mganga Mfawidhi wa Hospitali Dkt. Frolence Hilary amesema Hospitali ipo katika hali ya maboresho ambapo serikali ilitoa shilingi milioni 900 kwa ajii ya ukarabati wa Hospitali ambapo ujenzi unaendelea hivyo wakifika kwa wakati mwingine watakuta miundombinu imeboreshwa kwa kiasi kukubwa na wataweza kutoa huduma katika mazingira rafiki zaidi.

Huduma ya matibabu kutoka kwa Madaktari Bingwa wa Hospitali ya Rufaa Dodoma na Benjamini Mkapa imefanyika kwa kipindi cha wiki moja ikiwa ni sehemu ya mpango wa Hospitali kusogeza huduma za kibingwa kwa wananchi na jumla ya wagonjwa 114walifanyiwa upasuaji mkubwa na mdogo.