Mafunzo ya Uboreshaji wa Daftari la awali ngazi ya kata yatolewa kwa Watendaji Kondoa Mji

Tarehe iliyowekwa: May 14th, 2025

Halmashauri ya Mji Kondoa imetoa mafunzo kwa watendaji ngazi ya  Kata kuhusu uboreshaji wa daftari la wapiga kura kwa awamu ya pili.

Mafunzo hayo yamefanyika katika ukumbi wa Halmashauri ya Mji Kondoa ambapo zoezi la uandikishaji linatarajia kuanza tarehe 16 hadi 22 Mei, 2025 kuanzia saa 2:00 asubuhi hadi saa 12:00 jioni.

Mafunzo haya yanahusisha namna Bora ya ujazaji wa fomu kwa kutumia mfumo wa kuandikisha wapiga kura(Voters Registration System) pamoja na matumizi sahihi ya vifaa vya kuandikisha wapiga kura.

Akiongea na watendaji hao mgeni rasmi katika mafunzo hayo Ndg. Hassan Kiseto amewapongeza watendaji hao kwa kuteuliwa na kuwataka kwenda kufanya kazi kwa uaminifu kama wao walivyoaminiwa.

Ameongeza kuwa katika kila kituo kutakuwa na mawakala wa vyama jambo ambalo ni muhimu kwani linalenga kuleta uwazi katika zoezi zima lakini pia watatumika kuwatambua wapiga kura wa eneo husika hivyo wanaweza kupunguza kutokea kwa vurugu zisizokuwa za lazima.

Mafunzo hayo yamehudhuriwa na watendaji ngazi ya Kata takribani 64 ambao walikula kiapo kabla ya kuanza mafunzo, Waandikishaji Wasaidizi ngazi ya Tume, Mratibu wa zoezi na Wataalam kutoka Tume Huru ya Taifa ya Uchaguzi.