"Mkiamua hisabati si ngumu"- DC Mkanachi

Tarehe iliyowekwa: September 27th, 2023

Mkuu wa Wilaya ya Kondoa Dkt. Khamis Mkanachi amewataka walimu wa somo la hisabati shule za msingi Kondoa kuamua kufundisha kwa dhati na kwa kujitoa zaidi kwa kuwa somo hilo siyo gumu kama wanavyodhani.

Ameyasema hayo wakati akiongea na walimu wa somo la hisabati wanaopatiwa mafunzo ya uboreshaji ufundishaji wa somo hilo yanayofanyika katika ukumbi wa mikutano wa Kondoa Irangi ambayo yanafadhiliwa na programu ya Shule Bora.

"Niwaambieni jambo ambalo wengi mnalikosa walimu wengi hamna muda na wanafunzi, sina shida na nyie kufanya mambo yenu binafsi ila shida yangu ni commitment yenu kwa wanafunzi siioni,"amesema Dkt. Mkanachi

Amesema walimu wengi wapo shuleni kuhakikisha wanafundisha tu kwa mujibu wa ratiba kwa kuwa inamtaka afundishe lakini si kwa ajili ya wanafunzi kuelewa jambo ambalo linafanya watoto wasielewe somo hilo.

"Sasa naomba walimu wenzangu mkitaka kweli watoto wafaulu mnaweza na inawezekana kama mwalimu ukitaka utafanya kila mbinu kuhakikisha mwanafunzi anafaulu lakini walimu wasasa wengi hamjiongezi na hamjali mwanafunzi afaulu au asifaulu,"amesisitiza Dkt. Mkanachi

Ameongeza kuwa walimu wasasa wengi hawajitumi hata wanapokuwa darasani anapojua mwanafunzi huyu atafeli hajali jambo siyo ualimu ukilinganisha na walimu wengi wa zamani.

"Kuwashirikisha wanafunzi itatusaidia kuleta matokeo  mahusiano mazuri na wanafunzi na kuwajua kwa uwezo wao na majina yao ili wenye uwezo mdogo ujue utawasaidia kwa namna gani, lakini mwalimu wa leo ukimwambia akutajie majina hata robo tatu ya darasa hawezi atamjua monita tu wengine hawezi,"amesema Dkt. Mkanachi

Amewaambia walimu hao kuwa ili wafaulishe na kufanya vizuri lazima waamue wenyewe kwanza kwa kuwa hata wakifundishwa kwa semina za namna na mbinu zote msipoamua matokeo yatabakia vilevile na hawa wawezeshaji watabakia kuwa mashahidi tu kuwa walishawafundisha.

Kwa upande wake Katibu Tawala Wilaya ya Kondoa Ndg. Christina Kalekezi amewatia moyo walimu kuwa wanaweza na wao ndio walimu wa msingi hivyo wakifanya vizuri katika hesabu msingi huo wataenda nao hadi sekondari lakini wakifanya vibaya itakuwa ni ngumu kwa Sekondari.

Akishukuru wa niaba ya walimu wenzie Mwalimu amesema wanashukuru kwa mafunzo hayo na watakwenda kuyafanyia kazi yote waliyofundishwa na matokeo yataonyesha mabadiliko.

Mafunzo ya kuwajengea uwezo yanayofanyika katika ukumbi wa Kondoa Irangi kwa kuwashirikisha walimu 50 wa somo la hisabati kutoka shule za msingi za Halmashauri ya Wilaya ya Kondoa ili kuinua ufaulu wa somo hilo.