MSIACHE KUPIGA CHAPA MIFUGO- ULEGA

Tarehe iliyowekwa: December 17th, 2017

Naibu Waziri wa Mifugo na Uvuvi Mh. Abdallah Ulega amewasihi wafugaji wa wilaya za Chemba na Kondoa kutoacha zoezi la kupiga chapa mifugo yao ili serikali kuwa na takwimu sahihi ya mifugo.

Aliyasema hayo katika kijiji cha Mongoroma wakati wa ziara ya siku moja katika Halmashauri ya Chemba, halmashauri ya Mji Kondoa na halmashauri ya Wilaya ya Kondoa ili kukagua shughuli za mifugo ndani ya Wilaya hizo.

Alisema kuwa mifugo inazaliwa kila mwaka hivyo ni wajibu wao kuendelea na zoezi hilo kwani itasaidia kupata takwimu sahihi ambazo zitaisaidia serikali kupanga mipango ya mifugo kwa malisho, miundombinu, madawa na kuwavutia wawekezaji.

Aliongeza kuwa uwepo wa zoezi hilo pia utasaidia kumaliza migogoro ya wakulima na wafugaji ikiwa ni pamoja kuwasaidia wafugaji kuhama kutoka sehemu moja hadi nyingine kwani watakuwa na kibali kinachotambulika kisheria iwapo kutatokea uhaba wa malisho na kuhatarisha hali za marisho ya mifugo yao.

Aidha aliwapongeza viongozi wa wilaya hizo kwa kusimamia vizuri zoezi hilo na wafugaji kujitokeza kwani katika maeneo mengine watu wanasuasua wakati zoezi hilo ni kwa mujibu wa kisheria na wao wameona watekeleze kabla serikali haijaanza kuchukua hatua.

Halmashauri ya Wilaya ya Kondoa ina jumla ya ng’ombe 19800 ambapo hadi sasa jumla ya ng’ombe 16895 wamepigwa chapa sawa na asilimia 82 ya zoezi na katika ziara hiyo Naibu Waziri alipata fursa ya kufungua upigaji chapa katika kijiji cha Mongoroma.