NMB Kondoa wazindua wiki ya Huduma kwa Mteja na Watumishi Kondoa Mji

Tarehe iliyowekwa: October 5th, 2020

Benki ya NMB Kondoa wameanza maadhimisho  ya wiki ya huduma kwa mteja kwa kukutana na kuongea na kula keki kwa pamoja na watumishi wa Halmashauri ya Mji Kondoa Makao Makuu.

Maadhimisho hayo yamefanyika katika ukumbi wa Kituo cha Uwekezaji Kondoa ambapo yalihudhuriwa na watumishi wa Makao Makuu na watumishi wa Benki ya NMB Kondoa wakiambatana na Meneja wa benki hiyo.

Akiongea awali Mkurugenzi wa Halmashauri ya Mji Kondoa Msoleni Dakawa amewapongeza watumishi wa benki hiyo kutokana na huduma wanayotoa kwa watumishi kwa kipindi chote wanachofanya  kazi na Halmashauri ya Mji na kuahidi kuendelea kuwaamini ili kufikia malengo.

“Tunashukuru kwa kutukumbuka leo kweli tumekuwa pamoja tunaalikana katika matukio mbalimbali na toka muanze kutuhudumia hamjawahi kutuangusha tunawashukuru sana”, amesema Mkurugenzi Dakawa.

Kwa upande wake Meneja wa NMB Kondoa Francis Malire amesema kuwa watoa huduma wameamua kutenga wiki ya huduma kwa wateja ili kujirekebisha pale wanapofanya vibaya.

“Nguo hata  kama ikiwa safi bado inaweza kuwa na uchafu lakini hata tukijiuliza taulo linachafukaje ikiwa tunalitumia tukiwa wasafi? Basi hata sisi inawezekana tunafanya vizuri lakini  kuna sehemu tunajisahau na ndio maana tunaweka wiki hili la hudumakwa mteja ili tuwe karibu na wateja”,amesema Malire.

Hata hivyo kwa upande wao wameanza kuadhimisha wiki hiyo kwa kuzindua huduma kwa wateja mpya tatu ambapo mteja atawasiliana moja kwa moja na benki kidigitali.

“Tunazindua huduma za kidijitali zaidi ambapo kuanzia sasa mteja atauliza swali au huduma yoyote kwa WhatsApp namba 0747333444, pia tumezindua huduma ya kupata mrejesho kwa kutumia simu janja ambapo mteja ataipakua kwenye simu yake na kuitumia katika ATM mashine na kupata majibu hapohapo na huduma ya mwisho ni mteja mbaye atanunua luku bila kupata token atapiga simu huduma kwa mteja 0800002002 na kisha kutajiwa token za kuingiza,”amesema Malire.