NMB Vifaa Mlivyotoa Kondoa Vitatunzwa - DC Makota

Tarehe iliyowekwa: April 20th, 2018

Mkuu wa Wilaya ya Kondoa Mhe. Sezaria Makota amewahakikishia benki ya NMB kuwa vifaa walivyotoa katika Hospitali ya Wilaya ya Kondoa vitakuwa salama kutokana na historia ya watumishi wa hospitali hiyo.

Aliyasema hayo wakati wa kupokea vifaa vilivyotolewa na benki ya NMB tawi la Kondoa makabidhiano yaliyofanyika katika hospitali ya Wilaya  hivi karibuni.

Amesema kuwa watumishi wa hospitali hiyo wana historia ya kutunza vifaa vya hospitali hivyo vifaa walivyovitoa pia vitatumika kwa umakini mkubwa na utunzaji wa hali ya juu hivyo kuwahudumia wakinamama wengi zaidi.

“Asanteni NMB kwa kuhakikisha mama mjamzito anajifungua salama hivyo kwa msaada huu mlioutoa leo wakinamama na watoto watakuwa salama kabisa ukizingatia watumishi wa hapa hospitali pia wanajituma asanteni sana.”Alisema Makota

Naye Mganga Mkuu wa Hospitali ya Wilaya Dkt. Eusebi Kessy akipokea vifaa hivyo alisema kuwa msaada huo umekuja wakati muafaka kwani walikuwa na upungufu wa vitanda vya kujifungulia hospitalini hapo na zahanati za wilaya na katika kulithibitisha hilo tayari vitanda hivyo baadhi vimeshaanza kutumika hospitalini hapo na zahanati ya Kingale.

Aidha aliwaomba NMB kuendelea kutoa msaada kwani bado Hospitali ina upungufu wa vifaa tiba vingi hivyo wasichoke mara watakaporudi kuomba tena msaada ikiwa ni pamoja na mashirika mengine na watu binafsi kutoka maeneo mbalimbali.

Benki ya NMB imetoa msaada wa kompyuta 10 Shule ya Wasichana Kondoa, vitanda 5 vya kujifungulia wakinamama na seti 5 za vifaa vya kujifungulia Hospitali ya Wilaya na Madawati 50 kwa ajili ya Shule ya Sekondari Dalali ikiwa ni katika mpango wao wa kurudisha faida kwa jamii.