"Timizeni wajibu mdai haki"- Mkurugenzi Sweya

Tarehe iliyowekwa: June 21st, 2023

Watendaji wa kata na mitaa katika Halmashauri ya Mji Kondoa wametakiwa kutimiza wajibu wao kama watumishi wa serikali ndipo wadai haki kwani bila kufanya hivyo hawaitendei haki Serikali inayowalipa mishahara kwa kila mwezi.

Hayo yamesemwa na Mkurugenzi wa Halmashauri ya Mji Kondoa Ndg. Paul Sweya wakati wa kikao kazi cha pamoja kati yake na Watendaji wa kata na mitaa kilichofanyika katika ukumbi wa mikutano wa Halmashauri ya Mji hivi karibuni.

“Asiwepo mtumishi anayesema hafanyi kazi bila kupewa motisha kwa kuwa kwa kufanya hivyo ni kuidhurumu serikali inayokulipa kila mwezi na pia ni kwenda kinyume na taratibu za kiutumishi kwa kuwa motisha si lazima ila mtu hupewa anapoonyesha juhudi katika kazi,”amesema Mkurugenzi Sweya

Ameongeza kuwataka kutumia muda wanaokuwa ofisini kusoma sheria na miongozo mbalimbali inayotolewa na serikali ili wawe na uelewa mpana wa mambo mbalimbali utakaowasaidia katika kutekeleza majukumu yao ya kila siku kwa kuwa mambo yanabadilika kila siku.

“Nyie ni wasimamizi wa sheria katika maeneo yenu na mnamsaidia Mkurugenzi hivyo mbadilike kulingana na nyakati ili muweze kutimiza majukumu yenu vizuri na mjipange kwa kuwa mwaka wa fedha unaanza Julai tukaanze upya,”amesisitiza Mkurugenzi Sweya

Aidha amewataka kwenda kusimamia suala la ukusanyaji wa mapato na kufuatilia iwapo wanaojenga nyumba mpya wana vibali vya ujenzi kwa kuwa fedha hizo ndizo zinarudi kwa wananchi na kujenga madarasa, zahanati, mikopo na huduma mbalimbali za kijamii.

Aidha amewapongeza watumishi waliofanya vizuri na kuwasihi wengine kuiga mfano wa wenzao ikiwa ni pamoja na Halmashauri kufanya kazi kwa kushirikiana nao kwa kutatua changamoto walizoziwasilisha.

Kwa upande wake Mkuu wa Divisheni ya Utumishi na Utawala Ndg. Deogratious Nsanzugwanko amewataka watendaji kuzingatia sheria za utumishi wa umma na kanuni zake za mwaka 2022 ikiwemo wengi wao kubadilika kwa kutimiza wajibu wao.

“Kwanini tubembelezane watumishi hapa mnachelewa kazini katika vituo vyenu, kuondoka bila kuomba ruhusa na wengine kusafiri kabisa pamoja na kukiuka financial memorandum ya kukaa na fedha za serikali baada ya kuzikusanya,”amesema Ndg.Nsanzugwanko

Aidha amewakumbusha haki mbalimbali ambazo kama watumishi wanapaswa kuzipata ikiwemo kupanda cheo lakini wanapaswa kwanza kujaza Opras, likizo ya mwaka kila baada ya miezi 8 ya likizo ya awali, likizo ya ugonjwa na kuwasisitiza kuwa kupata kazi ni haki ya kila mtu pia watambue kufukuzwa kazi kupo.

Kikao kazi cha Watendaji wa Kata na Mitaa kimefanyika kwa lengo la kukumbusha masuala mbalimbali ya kiutendaji ambapo watendaji walijengewa uwezo na kilihudhuriwa pia na Wakuu wa Vitengo vya Sheria na Mazingira na Udhibiti wa taka ngumu.