Upimaji Viwanja Kuipandisha Thamani Bicha

Tarehe iliyowekwa: September 12th, 2018

Mtaa wa Bicha Halmashauri ya Mji Kondoa unatarajiwa kupanda thamani kutokana na zoezi la upimaji wa ardhi linalotarajiwa kuanza hivi karibuni.

Hayo yalibainishwa na Bwana Juma Mustapha Afisa Mipango Miji wa Kampuni ya Makazi Solution wakati wa kikao cha maridhiano na wananchi wa mtaa huo kuhusu upimaji wa ardhi utakaofanyika katika mtaa huo.

“Ramani ya Mipango Miji imeshakamilika na imepita sehemu zote muhimu zoezi linaloanza sasa ni upimaji wa maeneo yenu na hii ni fursa kwenu kwani kwasasa mtajua kila eneo na matumizi yake.” Alisema Mustapha

Aliongeza kufafanua kuwa zoezi hilo la upimaji ni shirikishi ambapo litawashirikisha wananchi wenye maeneo na Kampuni ya upimaji ambao watafanya kazi kupitia Idara ya Ardhi ya Halmshauri ya Mji Kondoa.

Aidha aliwashauri wananchi wa Bicha kutouza maeneo yao kwasasa kwani kwa kufanya hivyo kunawapunguzia kipato kutokana na kuwa maeneo yao mengi hayajapimwa na hivyo kukosa thamani hivyo wawe na subira hadi maeneo yao yapimwe ambapo thamani itaongezeka na kuwapatia kipato zaidi.

“ Mradi huu unaenda kuwaneemesha wanaBicha na Kondoa kwa ujumla sababu kwa kupima eneo pia Halmshauri itapata mapato na Serikali kuu hivyo itaboresha huduma za kijamii Kondoa na nchi nzima pia nawe mwananchi utapata hati miliki ya eneo lako ambayo itakusaidia kupata mikopo katika taasis za kifedha na kuinua kipato chako na kupunguza migogoro ya ardhi.”Alisisitiza Mustapha

Kwa upande wake Afisa Ardhi wa Halmashauri ya Mji Kondoa Bwana Anorld Mombeki aliwasihi wananchi kuiunga mkono kampuni hiyo na kutokuwa na wasiwasi nayo kwani wao kama wataalam wa ardhi wamejiridhisha utendaji kazi wao na uwepo wao kisheria na watafanya kazi wakiwa chini yao na kuwashauri wananchi wasioingia mikataba na kampuni kufika ofisi ya ardhi kupata ufafanuzi zaidi ili kuwajengea uelewa zaidi.

Hata hivyo mmoja ya wananchi waliojitokeza katika mkutano huo Mzee Seja aliishukuru kampuni kuja katika eneo lao kwa ajili ya kuongeza thamani maeneo yao na kuwahidi kuwaonyesha ushirikiano.

Mtaa wa Bicha ni moja ya Mitaa ya Halmashauri ya Mji Kondoa na upo katika barabara kuu ya Dodoma kuelekea Arusha ambapo Kampuni ya Mkazi Solution inatarajia kuanza zoezi la upimaji wa viwanja kwa kuingia mikataba na wananchi wenye maeneo na kugawana nao kwa kuwapatia asilimia 60 ya viwanja na wao kubakia na asilimia 40 ya viwanja ambapo viwanja 2700 vinatarajiwa kupimwa.