Vikundi malezi wilaya ya Kondoa wapewa sungura kuboresha lishe endelevu

Tarehe iliyowekwa: May 30th, 2021

Na. Leah Joseph

Mratibu wa lishe endelevu Mkoa wa Dodoma Bw. Abdon Hamaro ameiasa jamii kuendelea kuwapatia watoto wenye umri chini ya miaka mitano,wajawazito na wanaonyonyesha chakula chenye virutubisho vyote ili kuepukana na tatizo la utapiamlo na udumavu ambalo limekuwa changamoto kwa jamii nyingi za Kitanzania.

Kauli hiyo ameitoa wakati wa ziara fupi ya kukagua mabanda ya kufugia sungura na kugawa sungura kwa vikundi malezi vilivyopo ndani ya Halmashauri ya Mji Kondoa hivi karibuni.

"Tumegawa sungura bure kwa kila wanakikundi lengo ni kuhakikisha kuwa tunaondoa tatizo la udumavu na lishe duni kwa watoto wanawake na vijana balehe hivyo basi mjitahidi kuwatunza vizuri ili waweze kukua na mwisho watumike kama inavyokusudiwa, "amesema Mratibu wa Lishe endelevu.

Ameendelea kusema kuwa Serikali ya Tanzania imeonesha jitihada kubwa kwenye masuala ya lishe kupitia mpango mkakati wa uratibu wa lishe kwenye sekta mtambuka hivyo basi mpango mkakati huo unaihakikishia Serikali kupunguza tatizo la udumavu kwa watoto chini ya umri wa miaka mitano na kuongeza idadi ya wanawake walio katika umri wa kuzaa kula vyakula vyenye mchanganyiko wa kiwango kinachokubalika.

"Lishe endelevu itaisaidia Serikali kuongeza na kuboresha uwezo wa mamlaka ya Serikali za Mitaa kutekeleza mpango mkakati wa Taifa wa sekta mtambuka za lishe katika ngazi ya jamii lakini pia kurahisisha upatikanaji na utoaji wa huduma bora za lishe katika vituo vya afya pamoja na udhibiti wa usawa wa kijinsia katika mapato na matumizi ya rasilimali za nyumbani ili kuhakikisha upatikanaji wa vyakula mchanganyiko," amesisitiza Mratibu wa Lishe Bw. Abdon Hamaro.

Kwa upande wake mmoja wa wanufaika wa sungura kutoka kikundi malezi cha Chemchem  Bi Mwanate Hamis amewashukuru USAID kwa kuwapatia sungura hao na kuahidi kuwatunza na kuwatumia kama inavyokusudiwa.

"Tumefarijika sana kuona masuala ya lishe katika jamii yetu yanapewa kipaumbele na kuona umuhimu wa kuondoa tatizo la lishe duni unatekelezwa kwa vitendo na sisi tunaahidi kuwafuga kisasa ili waweze kuzalisha kwa wingi na kugawa kwa wengine ili jamii yote iweze kunufaika, "ameongeza Bi. Mwanate.

Ziara ya kugawa sungura kwa vikundi malezi ndani ya Halmashauri ya Mji Kondoa na Kondoa Vijijini imefanyika ikiwa ni muendelezo wa mpango mkakati unaotekelezwa na USAID kwa kushirikiana na wabia ukiwa na lengo la  kuondoa tatizo la udumavu na utapiamlo nchini huku Wilaya ya Kondoa ikiwa ni miongoni mwa wanufaika ndani ya Mkoa wa Dodoma ambapo ziara hiyo imeudhuliwa na Mratibu wa lishe Mkoa wa Dodoma, Afisa Kilimo Kondoa Mji, Kondoa Mji pamoja.