Wafugaji Kondoa washauriwa kufuga kwa tija

Tarehe iliyowekwa: September 29th, 2021

Wafugaji Wilayani Kondoa wamewashauriwa kufuga kwa tija ili kuendana na soko la sasa na kuinuka kiuchumi.

Ushauri huo umetolewa na Mwenyekiti wa Chama Cha Wafugaji Taifa Jeremiah Wambura wakati wa kikao cha pamoja na wafugaji wa Wilaya ya Kondoa kilichofanyika katika ukumbi wa Kondoa Irangi hivi karibuni

“Niwaombe tuungane na kujenga mahusiano mazuri ili tuweze kufanikiwa katika ufugaji wetu lakini ni lazima tuje na mpango mkakati wa kuondoa kero zinazowakabili wafugaji ndani ya wilaya yetu na tuone namna ya kuvisaidia vijiji vyote vinavyokaa karibu na hifadhi kuhakikisha wote wapo salama bila kubugudhiwa ”amesema Wambura.

Ameendelea kuwaomba wafugaji kuwa mabalozi wazuri wa mazingira kwa kuhakikisha kuwa hawapeleki mifugo yao kwenye hifadhi  ili kuendelea kulinda mazingira lakini pia kuachana na migogoro isiyo na tija kwenye jamii bali wawe mfano wa kuigwa .

“Umefika wakati wa  kuachana na ufugaji wa zamani ambao mtu unakuwa na mifugo mingi ambayo haina faida zaidi ya kukuletea hasara hivyo basi tuzingatie hili na tukumbuke kwamba soko la sasa linataka nini, na kwamba bila kuwa na mifugo bora inayokidhi viwango tutakuwa tumeachwa katika soko la ushindani,”amesisitiza Wambura.

Kwa upande wake Katibu Tawala Wilaya ya Kondoa Andrea Ng’wani akimuwakilisha Mkuu wa Wilaya Mhe Khamis Mkanachi amemshukuru Mwenyekiti wa chama cha wafugaji Taifa Jeremiah Wambura kwa kuweza kufika Kondoa na kuonana na wafugaji hao na kufanya nao kikao.

“Tunajua zipo changamoto nyingi zinazowakabili wafugaji wetu niseme tu tunazishughulikia japo hatuwezi kuzitatua kwa wakati mmoja  lakini kama wilaya tunatambua na kuheshimu uwepo wenu na mchango wenu kwa serikali yetu na kwa hilo nawapongeza sana,”amesisitiza Ng’wani.

Halikadhalika mmoja wa wafugaji Fatina Hussein amepata nafasi ya kutaka kujua ni kwanini voiwango vya chanjo vipo juu ikiwa kipato chao ni cha chini na alipatiwa ufafanuzi kuwa utaratibu huo ni  wa kawaida umewekwa na Serikali chini ya Wizara yenye dhamana hivyo kiwango wanachotozwa  ni halali kabisa.

Mkutano wa wafugaji na viongozi wa  Chama Cha Wafugaji umefanyika ukiwa na lengo la kujadili na kuzungumzia changamoto mbalimbali zinazowakabili wafugaji Wilaya ya Kondoa ambapo  wamepata nafasi ya kuchagua viongozi wao wa muda na umehudhuriwa na Viongozi wa Mkoa, Kanda, Wajumbe wa Kamati Tendaji pamoja na wafugaji kutoka Halmashauri zote za Wilaya ya Kondoa.