Wananchi Kondoa washauriwa kurasimisha maeneo kupata hati miliki

Tarehe iliyowekwa: May 9th, 2021

Wananchi wa Wilaya ya Kondoa wametakiwa kuhakikisha kuwa maeneo wanayomiliki yamerasimishwa na wanapata hati miliki ndani ya siku 90 kulingana na marekebisho ya sheria mpya ya ardhi namba nne ya mwaka 2020.

Kauli hiyo ameitoa  Afisa Tarafa ya Kondoa Mjini Ally Mbena wakati wa kikao cha kuhamasisha urasimishaji na upimaji wa ardhi kilichofanyika katika ukumbi wa Halmashauri ya Mji Kondoa akimuwakilisha Mkuu wa Wilaya ya Kondoa Mh. Sezaria Makota hivi karibuni.

"Suala la urasimishaji na upimaji wa ardhi ni la kisheria hivyo nitoe rai kwa viongozi wa serikali za vijiji, mitaa na kata kuendelea kuhamasisha wananchi ili waweze kujitokeza kwa wingi kupimiwa maeneo yao na kupewa hati miliki, " amesema Mbena.

Aliendelea kusema kuwa wengi wanadhani kuwekewa alama za bikoni kwenye maeneo yao basi wamemaliza kazi lakini wanasahau kwamba hiyo haikupi sifa ya wewe kumiliki eneo hilo kisheria.

"Niwaombe viongozi wote kila mtu kwa nafasi yake tuende tukasimamie sheria tusiwe chanzo cha kukwamisha wananchi kupata hati miliki kwani kwa kufanya hivyo tunaikosesha Wilaya yetu mapato," amesisitiza Afisa Tarafa Mbena.

Hata hivyo aliongeza na kusema  kuwa ni wakati wa kuacha siasa na mijadara isiyo na malengo ni muda wa kuchapa kazi na kwamba serikali ya awamu ya sita iko macho hivyo kwa watendaji wote wanaofanya kazi kwa mazoea kuacha maramoja kwani mazoea yanapunguza ufanisi wa kazi lakini pia palipo na changamoto zisemwe ili zitatuliwe.

Kwa upande wake mwanasheria Halmashauri ya Mji Sued Shabani amewataka watu  kuelewa kwamba ardhi ni mali ya serikali na ndio maana inanunuliwa na kulipiwa kodi pamoja na kibali cha ujenzi.

"Mtu yeyote anapopata ardhi ahakikishe imepimwa na anapata hati miliki ndani ya siku 90 pia ni wajibu kulinda mipaka ya eneo lako ili kuepuka migogoro ya ardhi, "ameongeza mwanansheria.

Halikadhalika amewatahadharisha watu kuwa maeneo ya mijini yametengwa mahsusi kwa ajili ya mahitaji ya kudumu ambayo ni biashara na makazi na si vinginevyo hivyo kufanya shughuli za ufugaji na kilimo ni kosa kisheria, pia kabla hujajenga ni lazima uwe na kibali cha ujenzi.

"Kuna faida nyingi za kuwa na hati miliki kama vile kuongeza thamani ya eneo ambapo unaweza kukopesheka pia huondoa migogoro ya ardhi hivyo basi kila mtu awe balozi wa kuhamasisha wananchi ili waweze  kupata hati miliki na kulipia kodi ya ardhi ambayo itasaidia kuongeza mapato ya Halmshauri na Taifa kwa ujumla, "amesisitiza Mwanasheria  Shaban.

Kikao cha kuhamasisha urasimishaji na upimaji wa ardhi kimefanyika ikiwa ni agizo lililotolewa na Naibu Waziri wa ardhi,  Nyumba na Maendeleo ya Makazi Mh. Dkt Angela Mabula akiwataka watu kuwa na hati za umiliki wa maeneo yao ndani ya siku 90,ambapo kikao hicho kimehudhuriwa na Kaimu Mkurugenzi Halmashauri ya Mji, Mwenyekiti wa Halmashauri, Waheshimiwa Madiwani,Maafisa Ardhi kutoka Kondoa Mji na Kondoa Vijijini, Watumishi wa Halmashauri, Watendaji wa Kata na Mitaa, Wenyeviti wa Mitaa na Vijiji pamoja na waandishi wa habari.