Waratibu Elimu Kata na Walimu Wakuu wafundwa

Tarehe iliyowekwa: October 19th, 2018

Maafisa Elimu Kata na walimu wakuu wa shule za msingi katika Halmashauri ya Mji Kondoa wametakiwa kufanya kazi zao kwa kufuata sheria, kanuni na taratibu za utumishi wa umma katika utendaji wa kazi zao za kila siku ili kuboresha elimu.

Hayo yalisemwa na Kaimu Afisa Elimu Msingi Halmashauri ya Mji Kondoa Mwalimu George Lukoa wakati wa kikao kazi kati ya watendaji wa Idara ya elimu msingi na viongozi hao wa elimu ngazi ya kata na shule katika ukumbi wa kituo cha walimu Iboni Kondoa mjini.

Alisema kuwa walimu wakuu ndio viongozi wa walimu shuleni hivyo wanapaswa kusoma saokolojia ya kila mwalimu jambo ambalo litawasaidia kupunguza migogoro makazini kwani itawarahisishia kujua jinsi ya kuenenda na kila mwalimu na kuwapa uhuru wa kuwasikiliza wanapowasilisha changamoto zao ili watatue kwa pamoja.

Aliongeza kwa kuwataka kuepuka kupokea rushwa za namna yoyote kutoka kwa walimu ili wawafichie madhaifu yao na wazazi ili kuwasaidia wanafunzi wakati wa mitihani jambo ambalo linadhalilisha taaluma yao na kuwashushia heshima kwa jamii lakini pia kuzalisha watoto wasio na maarifa yoyote.

“Twende tukafanye kazi kwa kushirikiana ili kujiandaa na mtihani wa darasa la nne tukajiandae vizuri na tuwaache watoto wakafanye mitihani wenyewe na tukatoe majaribio ya kutosha kwa kipindi kilichobakia, kuyasahihisha na kutoa matokeo kabla ya mtihani wa darasa la nne ili mtoto ajipime na kujirekebisha penye tatizo.”Alisisitiza Lukoa

Akiongea katika kikao hicho Mwalimu Egid Mhema kutoka Idara ya elimu aliwasihi walimu hao kusimamia nidhamu, malengo na majukumu waliyojiwekea ili kuongeza ufaulu pamoja na wastani wa ufaulu ili kushika nafasi nzuri kitaifa na inawezekana iwapo viongozi wote watashikamana kwa pamoja.

Akishukuru kwa niaba ya wenzie Afisa Elimu kata ya Kolo Mwalimu Magreth Stephen alishukuru viongozi wa wilaya kwa kuwakumbusha majukumu yao na kuwasihi maafisa elimu kata na walimu wakuu kufanya kazi kwa pamoja bila kujali kama shule ni ya serikali au binafsi ili kuongeza wastani wa ufaulu  ikiwa ni pamoja na kuendana na kasi ya awamu ya tano.

Kikao kazi cha viongozi wa elimu Idara ya elimu msingi, maafisa elimu kata na walimu wakuu kimefanyika ili kujiandaa na mtihani wa darasa la nne ikiwa ni pamoja na kukumbushana majukumu ya utendaji kazi na kujadiliana masuala mbalimbali ya kuboresha elimu ya msingi katika halmashauri ya mji Kondoa yenye jumla ya shule za msingi 29.