Wasiohudhuria mkutano wa wananchi Unkuku kutozwa faini

Tarehe iliyowekwa: December 23rd, 2020

Wananchi wa Mtaa wa Unkuku kata ya Kilimani ambao hawakuhudhuria mkutano wa wananchi wa uhamasishaji wa ujenzi wa madarasa Shule ya sekondari Bicha wamepewa wiki moja kulipa faini ya shilingi elfu mbili ili iwe fundisho kwa wakati mwingine.

Hayo yamesemwa na Afisa Tarafa Kondoa Mjini Ally Mbena wakati wa mkutano wa wananchi wa mtaa huo uliofanyika katika uwanja wa ofisi ya Mtaa na kuhudhuriwa na wananchi wachache tofauti na idadi ya wakazi wa mtaa huo.

"Nimemuuliza Mwenyekiti mbona wananchi wachache leo tofauti na mkutano wa awali lakini kaniambia sababu ule ni mkutano wa masuala ya TASAF ndio maana wananchi walikuja wengi siyo sawa hii tusibague mikutano yatayozungumzwa  hapa yanahitaji maamuzi ya pamoja," amesema Mbena

Hata hivyo aliongeza kuwa jambo lililopo kwasasa ni ujenzi wa vyumba viwili vya madarasa katika Shule ya Sekondari Bicha hivyo ni wajibu wa wananchi wote kuchangia ili kuhakikisha ujenzi unakamilika kwa wakati kwani hadi sasa wapo nje ya wakati lengo ni kuhakikisha watoto wote waliofaulu wanaenda shuleni.

"Nawasihi sana ndugu zangu tuendelee pia kuwaandalia watoto wetu mahitaji muhimu ili shule zikifunguliwa waende shuleni kwani taarifa za ufaulu si za ghafla matokeo yamebandikwa wilayani lakini pia yatabandikwa ofisi ya Mtaa ili kila mtu aone mwanaye anaenda shule gani lakini nitumie fursa hii pia kuwakumbusha kuwaandikisha watoto wa awali na darasa la kwanza ili wapate haki yao ya msingi," amesisitiza Mbena.

Naye mwakilishi wa Mkurugenzi Mwalimu Selina Fundi amesema kuwa ujenzi huo wa madarasa katika Shule ya Bicha umekuja kutokana na kuongezeka kwa ufaulu kwa mwaka huu ambapo jumla ya wanafunzi 279 wamechaguliwa kujiunga na shule hiyo hivyo mahitaji ni vyumba 6 na shuleni hapo kuna madarasa manne ndio maana umetokea upungufu wa vyumba viwili ambavyo tayari vimeanza kujengwa kwa kutumia mapato ya ndani.

"Maendeleo yanaletwa na sisi wananchi hivyo tukitoe kwa hali na mali kuhakikisha madarasa yanaisha lakini tutashirikiana na Halmashauri kujenga madarasa na pia tuna upungufu wa viti na meza 323 hivyo tutahitajika kujitoa pia kwa hilo na tumeshaanza upasuaji wa mbao ili kukabiliana na upungufu huo ili watoto wetu wasome katika mazingira mazuri,"amesema Mwalimu Selina.

Akitoa msimamo wa maazimio ya viongozi wa mtaa Kaimu Mtendaji wa kata ya Kilimani Merci Mmbasha amesema kila nguvu kazi katika mtaa huo itatoa shilingi elfu kumi na taarifa ya mapato na matumizi itasomwa katika mkutano wa mtaa ikiwa ni pamoja na kutoa majina ya watakaotoa na wasiotoa mchango.

Mkutano huo ni mwendelezo wa mikutano ya wananchi na wataalam wa halmashauri katika kuhimiza ujenzi wa vyumba vya madarasa ambapo ulihudhuriwa pia na Afisa Maendeleo ya Jamii, Kaimu Afisa Mipango, Afisa Elimu Ufundi na Afisa Utamaduni na wananchi watatu walijitolea miti kwa ajili ya utengenezaji wa madawati.