"Watendaji simamieni Mapato,miradi na utatuzi wa kero za wananchi"- Mkurugenzi Majaliwa

Tarehe iliyowekwa: March 26th, 2024

Mkurugenzi wa Halmashauri ya Mji Kondoa Ndg. Said Majaliwa amewataka watendaji wa kata na mitaa kukuhakikisha wanasimamia ukusanyaji wa mapato, miradi, kusikiliza na kutatua kero za wananchi ikiwa ni pamoja na kuepuka kuzalisha kero mpya.

Ameyasema hayo wakati wa kikao chake na watendaji wa kata na mitaa ya Halmashauri ya Mji Kondoa kilichofanyika katika ukumbi wa mikutano wa Halmashauri.

"Katika kipindi chote nitakachokuwepo Kondoa vipaumbele vyangu ni vitatu tu ambavyo nitavitumia kupima utendaji kazi wenu ambavyo mkifanya vizuri nyie ni sifa kwa Halmashauri na wala hamtagombana na mimi zaidi ya kuwa marafiki,"amesema Mkurugenzi Majaliwa

Amesema kipaumbele cha kwanza ni kuhakikisha watendaji wote wa kata na mitaa wanakusanya mapato ikiwa ji pamoja na kusimamia vyanzo vyote vya mapato katika maeneo yao ambapo hatamvumilia yeyote ambaye atasababisha upotevu wa mapato zaidi anategemea ushirikiano kwa kupatiwa taarifa za namna ya kuboresha njia za ukusanyaji wa mapato.

"Kama kuna mtu anakusanya fedha katika eneo lako mkague mara kwa mara na toa ushauri kwake kwa maandishi mkiboresha njia za ukusanyaji wa mapato ni rahisi kupata fedha za kurudisha kwenu na mkapata fedha za uendeshaji wa ofisi zenu na nitahakikisha nitasimamia mpate posho zenu,"amesisitiza Mkurugenzi Majaliwa

Ameongeza kwa kuwataka watendaji hao kuwa na taarifa zote muhimu za wafanyabiashara katika maeneo yao ikiwemo orodha yao na kufanya ukaguzi wa leseni zao na kuwa hatafurahishwa na Mtendaji ambaye hatakiwa na taarifa za makusanyo katika eneo lake.

Aidha amesema kipaumbele chake cha pili ni katika usimamizi wa miradi ambapo amewataka watendaji hao kuijua miradi yote katika maeneo yao na kuwaagiza watendaji wa kata kuhakikisha wanawawezesha watendaji wa mitaa kufika katika miradi yao.

"Tenga muda wa kutembelea miradi yako sintakuelewa endapo nitakuta mradi umesimama na hujatoa taarifa yoyote nijulisheni penye changamoto na tuwe na macho ya karibu si kwa miradi ambayo fedha zimeingia katika akaunti zenu bali kwa fedha pia zilizopelekwa moja kwa moja kwenye vituo kama shule na vituo vya afya,"amesema Mkurugenzi Majaliwa
Hata hivyo amewataka watendaji kusikiliza kero za wananchi na kuzitatua bila kuangalia hali ya mtu na kuachana na tabia za kuwajibu vibaya wananchi na kutowafukuza ikiwa ni pamoja na kuwahudumia kwa moyo mmoja.
"Uongozi ni pamoja na kubeba na kupokea tukawasikilize wananchi na muwape majibu ya ukweli mwenye haki aipate na si kuwaambia nenda Halmashauri tusiwasumbue ikiwezekana piga simu omba ushauri tutakushauri ukiwa hukohuko na mkaweke kumbukumbu ya kero mnazozisikiliza na kuzitatua kwenye daftari la malalamiko,"ameshauri Mkurugenzi Majaliwa
Kikao cha watendaji wa kata na mitaa na Mkurugenzi kimefanyika ikiwa ni mwendelezo wa vikao vyake vya kukutana na watumishi mbalimbali kwa lengo la kujitambulisha na kusikiliza changamoto zao mara baada ya kuhamia katika Halmashauri ya Mji Kondoa kutoka Halmashauri ya jiji la Tanga.