Watendaji wa Mitaa Walimu wakuu watakiwa kuwajibika

Tarehe iliyowekwa: October 6th, 2020

Wenyeviti na Watendaji wa mitaa, Walimu wakuu, Wajumbe wa Kamati za shule na wajumbe wa Kamati za ujenzi za shule wametakiwa kuwajibika na kuwa waadilifu ili kutimiza malengo yaliyowekwa na Serikali katika maeneo yao.

Hayo yamesemwa na Mkurugenzi wa Halmashauri ya Mji Kondoa Msoleni Dakawa alipofanya vikao na viongozi hao katika Shule za Msingi Maji ya Shamba na Bolisa.

“Nasikitishwa sana na hali ya ujenzi katika shule zenu mpo nyuma sana na muda unakimbia fedha zipo kwenye akaunti zenu kwa zaidi ya mwezi sasa ujenzi hauendelei mnakwama wapi katika kusimamia ujenzi? Aliuliza Mkurugenzi Dakawa.

Ameongeza  kusema kuwa kuna baadhi ya walimu wakuu wamekosa uzalendo kwa kuongea na mafundi (Local Fundi) ili wapatiwe fedha ndiyo wawapatie kazi katika ujenzi unaoendelea baada ya kupata fedha za EP4R  hali inayosababisha miradi kuchelewa kukamilika na kuwanyima haki ya msingi wanafunzi.

“Uongozi wa Kata na mitaa ndiyo wasimamizi wa miradi ya maemdeleo katika maeneo yenu  lakini mnakaa pembeni siyo sawa na shule ni mali ya Serikali ya Mtaa, tuwahamasishe wananchi wajitolee nguvu kazi ili fedha itakayobaki tuboreshe miundombinu mingine ya shule ikiwemo kununua madawati, viti na meza za walimu, vyoo vya walimu pamoja na nyumba za walimu ”,amesisitiza Mkurugenzi  Dakawa.

Hata hivyo amewataka viongozi hao kuwa na uchungu na mali za shule kwani kinyume na hapo ni sawa na kutowatendea haki wananchi wanaowaongoza na kuwaagiza kukamilisha miradi hiyo ndani ya mwezi huu.

Halmashauri ya Mji Kondoa imepokea zaidi ya shilingi milioni 291 kwa ajili ya ujenzi wa madarasa, vyoo na umaliziaji wa nyumba za walimu katika shule za Msingi Mongoroma, Kingale, Mpalangwi, Iboni, Maji ya Shamba, Miningani na Shule ya Sekondari Ula.